सुदूरपश्चिम खप्तड गोल्डकपः थ्रीस्टार क्लव उपाधि होडमे

पहुरा समाचारदाता
धनगढी, १९ फागुन । सर्वाधिक पुरस्कार राशिके नेपाल आइस सुदूरपश्चिम खप्तड गोल्डकपमे रुस्लान थ्रिस्टार क्लव उपाधि होडमे पुगल बा ।
अँटवार हुइल अन्तिम सेमिफाइनल खेलमे रुस्लान थ्रिस्टार हिमालयन शेर्पा क्लबहे एक गोलसे पराजित करके फाइनल यात्रा तय करल हो । थ्रिस्टारके जितमे पहिल हाफके २४ औं मिनेटमे आशिष राई निर्णायक गोल करलै । पहिल हाफमे संजोग राईके प्रहारहे हिमालयन शेर्पाके गोलरक्षक टेकेन्द्र थापा उत्कृष्ट बचाव करलै ।
ओस्टेक करके, पहिल हाफमे हिमालयन शेर्पासे पाइल सुनौलो मौकाहे गोलमे परिणत करे नाइसेक्लै । गोलपोष्ट लग्गेसे हिमालयनके विजय श्रेष्ठसे करल प्रहारहे थ्रिस्टारके गोलरक्षक पूर्ण चेम्जोङ गोल हुइनासे विफल परलै । ओस्टेक करके, भिषण गुरुङके सशक्त प्रहारफे गोलपोष्टके दिशा लेहे नइसेकल ।
दुसरा हाफमे थ्रिस्टारसे हिमालयन शेर्पाके खेल मजा डेखल रहे । मने, हिमालयनसे विपक्षीके टिमके गोलपोष्टमे प्रहार करे नाइसेक्लै । खेलमे थ्रिस्टारके अनन्त तामाङ म्यान अफ द म्याच घोषित हुके पुरस्कृत हुइलै । उहाँ १० हजार रुप्या पुरस्कार प्राप्त करलै । प्रतियोगिता समापनपाछे प्रतिक्रिया डेटी हिमालयन शेर्पाके टिम व्यवस्थापक सुशील तामाङ थ्रिस्टारसे मजा खेल खेल्लेसेफे गोल करे भर नाइसेकल बटैलै । ‘खेलाडीहुक्रे आज जौन खेल खेल्नै उहीसे मै बहुट सन्तुष्ट बाटु, उहाँ कहलै– ‘हम्रे गोलकेल नइसेक्ली मने, खेल मजा हुइल ।’ उहाँ पाइल मौकाहे सदुपयोग करे नाइसेक्के उपाधि होडमे पुगे नइसेकल उल्लेख करलै ।
ओस्टेक करके, रुस्लान थ्रिस्टारके प्रशिक्षक मेघराज केसी हिमालयन शेर्पाके खेलके प्रशंसा करलै । ‘खेल हम्रे जिटलेसेफे हमारसे मजा ओइने खेल्लै,’ उहाँ कहलै– ‘टिममे नयाँ खेलाडीहुकनके समावेश करल ओरसे दर्शक अपेक्षा करल अनुसार हमार टिम खेल प्रदर्शन करे नाइसेकल हुइट ।’
उहाँ खेल अवधिभर जम्मा दुई ठो केल गोलपोष्टमे प्रहार करल जनैटी थप्लै–‘एक ठो गोलमे परिणत हुइल दुसर गोल नइहुइल ।’ फाइनल खेलमे सुधार करके खेल खेल्न प्रशिक्षक केसीके कहाई रहे । ‘नकआउट प्रतियोगितामे जबफे खेल सुधार कैना चुनौती रहटी आइल बा, उहाँ कहलै–‘फाइनलमे हम्रे सुधार करबी ।’
फागुन २० गते थ्रिस्टार ओ आयोजक सुदूरपश्चिम–११ बीच उपाधि भिडन्त हुई । आयोजक सुदूरपश्चिम–११ एपीएफहे पराजित करके यी आघे फाइनलमे पुगल रहे ।
प्रतियोगिताके विजेता टिम नगद २१ लाख एक रुपियाँ ओ उपविजेता १० लाख एक रुपियाँ पुरस्कार प्राप्त करही । ओस्टेक करके, प्रतियोगिताके सर्वोत्कृष्ट खेलाडीहे मोटरसाइकल प्रदान कैना आयोजक जानकारी डेले बा ।