स्वास्थ्य क्षेत्रमे चरम अनियमितता ओ भ्रष्टाचारः मन्त्री ढकाल

पहुरा समाचारदाता
चौमाला, २० फागुन । स्वास्थ क्षेत्रमे चरम अनियमितता ओ भ्रष्टाचार हुइना करल संघीय सरकारके स्वास्थ्य तथा जनसंख्या मन्त्री भानुभक्त ढकाल बटैले बाटै ।
मंगरके रोज गौरिगंगा नगरपालिकाके आयोजनामे ५ दिनसम संचालन हुइना स्वास्थ्य महोत्सवके उदघाटन करटी मन्त्री ढकाल केन्द्र सरकार, प्रदेश ओ स्थानीय सरकारसे खरिद कैना औषधीके मोलमे भारी अन्तर ओ अनियमितता हुइटी हुइटी रहल उल्लेख करटी सरकारी अस्पतालमे रहल उपकरण प्रयोगमे नइनानके निजी अस्पतालहे प्रोत्साहन कैना समके खेल हुइना करल बटैलै ।
सरकार निःशुल्क उपलब्ध करैना औषधिके सट्टा निजी फार्मेसीमे पैना औषधिके सिफारिस कैना जैसिन विकृति विसंगति रहल अपन मन्त्रालय जानकार रहल ओरसे तीन महिनामे यकर निराकरण करके जनता महशुस कैना कार्यके तयारी करटी रहल मन्त्री ढकाल बटैलै । स्वास्थ्यमे रहल विकृतिके अन्त्य कैना दिशामे सरकारसे काम कैना बटैटी ढकाल गाउँ टोल वस्तीसम मुख्य खास–खास रोगके औषधि जनतासे पैना व्यवस्था मिलैना तयारीमे रहल समेत बटैलै । सुविधाके खोज्टी नेंग्ना मानवीय स्वभावुसे सरनासेफे नइसरना रोगके ढेर लग्ना ओरसे परम्परागत खानपान स्वस्थ्यकर रहल उल्लेख्य करटी मन्त्री ढकाल गौरीगंगा नगरपालिका देशमे पहिल चो जनताके स्वास्थ्य प्रति सजग बन्टी नयाँ सोच शैलीके स्वास्थ्य महोत्सव लगाके उदाहरणीय काम करल बटैलै ।
महोत्सव उद्घाटनके अवसरमे ७ जाने अपाङ्ता रहल व्यक्तिहुकनहे व्हील चेयर प्रदान करल रहे । स्वास्थ्य महोत्सवमे टमान विशेषज्ञ डाक्टरसे स्वास्थ्य परिक्षण कैजाई । आँखा, नाक, कान, घाँटी, महिलाहुकनके पाठेघरके क्यान्सर जाँच, एचआईभी ओ हेपाटाइटिस वि के परिक्षण, औलो जाँच, सिकलसेल एनिमिया, महिलामे आङ गिरना समस्याके जाँच, मानसिक स्वास्थ्य परिक्षणके साथमे दुव्र्यसन मुक्त स्वास्थ्य मुलक आध्यात्मिक प्रदर्शनी, रक्तदान कार्यक्रम, योग शिविर, पोषण सम्बन्धी उपभोक्ता शिक्षा जानकारी लगायत स्वास्थ्य सम्बन्धी टमान साँस्कृतिक, नृत्य, नाटक लगायत हरेक दिन प्रस्तुति रहना बा । सकारे ६ बजेसे योग शिविर ओ ८ बजेसे योगी डाक्टर विकाशान्नद के प्रवचन रहना बा ।
नगर प्रमुख भीमबहादुर देउवाके सभापतित्वमे हुइल महोत्सव उद्घाटन कार्यक्रम सुदूरपश्चिम प्रदेश सभा रतन थापा शुभकामना मन्तव्य करले रहिट । सेवा ग्राहीके लाग आवातजावत कैना सकारे ११ बजेसे साँझके ३ बजेसम निःशुल्क यातायातके व्यवस्था मिलाइल बा ।