कोरोनाहे नियन्त्रण कैके छोरब : मुख्यमन्त्री भट्ट

डोटी, १ भदौं । सुदूरपश्चिम प्रदेशके मुख्यमन्त्री त्रिलोचन भट्ट विश्वव्यापी महामारीके रुपमे फैलटी गैल कोभिड–१९ के रोकथाम तथा नियन्त्रण कैना सरकारके प्रमुख उद्देश्य रहल बटैले बाटै ।

प्रेस सेन्टर डोटीसे सोम्मारके डोटीके दिपायल राजपुरमे आयोजना करल पत्रकार भेटघाट कार्यक्रममे उहाँ कहलै “कोरोना रोकथाम तथा नियन्त्रणमे प्रदेश सरकार ढिउर केन्द्रित हुइल बा, कोरोनाहे परास्त कैके छोरब ।”

मुख्यमन्त्री भट्ट प्रदेश सरकारसे कोरोना नियन्त्रणमे उल्लेख्य भूमिका खेलल् कारण समुदायमे कोरोना फैले नाइ पाइल दाबी समेत करलै । उहाँ कहलै, “भारतसे रोजगारी कैके आइल ८० से ९० हजार नागरिक क्वारेन्टिनमे रख्ना सम्भवतः हमार प्रदेश पहिल हो, हम्रे समयमे सचेत हुइबर समुदायमे कोरोना सर्नसे बचल बाटी, हम्रे कोरोनाहे नियन्त्रण कैके छोरब ।”

मुख्यमन्त्री भट्ट संघीय सरकारसे प्रदेश सरकारके बात नाइ सुनके सुदूरपश्चिम प्रदेशमे कोरोना संक्रमितके संख्या बह्रल बटैलै । “हम्रे सीमानाका सिल करी ओ पिसिआर परीक्षण कैके किल नेपाल छिरे डेना कहलमे संघीय सरकार नाइ मानल, सीमानाका खुलागैल, अब्बे कोरोना संक्रमितके संख्या बह्रल”, उहाँ कहलै, “संघीय सरकार प्रदेश सरकार कहल नाइ मानके जम्मा दुई जाने संक्रमित डेखगैल सुदूरपश्चिममे हजारौँ संक्रमित थपगैलै, हम्रहीनहे कन्ट्रोल कैना समस्या हुइल बा ।”

अक्के गाउँपालिकामे वर्षेनी अक्के मेरके योजना बजेट पर्ना कना पत्रकारके जिज्ञासामे मुख्यमन्त्री भट्ट प्रदेश सरकारसे वर्षेनी अक्के योजनामे बजेट नाइ डारल ओ कहीकहोरोसे ओइसीक बजेट परल रलेसे तत्काल खारेज कैना समेत बटैलै ।

उहाँ कहलै, “प्रदेश सरकारसे जानीजानी अक्के योजनामे वर्षेनी बजेट डारले नाइहो, कहीँकहोरोसे कोनो गलत तरिकासे बजेट गैल रलेसे खारेज हुइ ।”