जोशीपुरसे ३९ जाने मेलमिलापकर्ताहुकनहे साईकल वितरण
पहुरा समाचारदाता
जोशीपुर, १८ असार । कैलालीके जोशीपुर गाउँपालिका न्यायिक समितिसे सुचिकृत हुइल ३९ जाने मेलमिलापकर्ताहुकनहे बुधके रोज साईकल वितरण कैगिल बा ।
आर्थिक बर्ष २०८१÷२०८२ विनियोजित बजेट मार्फत उ साईकल वितरण करल हो । न्यायिक समिति संयोजक रेखादेवी कठरियाके अध्यक्षतामे हुइल कार्यक्रमके प्रमुख अतिथि गाउँपालिका अध्यक्ष चित्र बहादुर चौधरी रहल रहिट । कलेसे अतिथिमे प्रमुख प्रशासकीय अधिकृत अमितकुमार शाह, मीनराज कठरिया रहल रहिट ।
मेलमिलापकर्ताहुकनहे न्यायिक समिति संयोजक रेखादेवी कठरिया, प्रमुख अतिथि गाउँपालिका अध्यक्ष चित्रबहादुर चौधरी, प्रमुख प्रशासकीय अधिकृत अमितकुमार शाह, मीनराज कठरिया लगायतसे मेलमिलापकर्ताहुकनहे साइकल हस्तान्तरण करल रहिट ।
स्थानीय स्तरके विवाद समाधानमे मेलमिलापकर्ताहुकनके महत्वपूर्ण भुमिका रहल ओ एक ठाउँसे दुसर ठाउँ जैना सहजुल होए कना उद्देश्यसे साइकल वितरण करल गाउँपालिका अध्यक्ष चित्रबहादुर चौधरी बटैलै ।
ओस्टेक करके यी पालिकामे मेलमिलापकर्ताके रुपमे प्राकृतिक श्रोत द्वन्द्व रुपान्तरण केन्द्र नेपाल सुचिकृत हुइल ओरसे संस्थाहे समेत साईकल वितरण करल बा । कार्यक्रम सञ्चालन उजुरी प्रशासन प्रमुख अमृता सिंह चौधरी करल रहिट ।
