डोटीमे एक अठुवार निषेधाज्ञा ठपल

पहुरा समाचारदाता
धनगढी,२१ भदौ । डोटीमे एक अठुवारके लाग निषेधाज्ञा ठपल बा । जिल्ला संकट व्यवस्थापन केन्द्र डोटीके अँटवारके बैठल बैठकसे २१ गते रात १२ बजे से २८ गते रात १२ बजे समके लाग निषेधाज्ञा ठप्ना निर्णय करल हो ।

कोरोना सक्रमणके जोखिम बढटी गैलपाछे फेरसे निषेधाज्ञा एक अठुवारके लाग ठप करल जिल्ला प्रशासन कार्यालय डोटी अँटवारके रोज सूचना जारी करके जानकारी डेले बा । यिहीसे आघे भदौ १४ गतेसे २१ गते रात १२ बजेसम सात दिनके लाग करल निषेधाज्ञा करल रहे । निषेधाज्ञाके समयमे अत्यावश्यक बाहेकक सेवा ठप्प रहना जिल्ला प्रशासन कार्यालय जनैले बा ।

सरकारसे देशभर संक्रमण बह्रे लागलपाछे निषेधाज्ञाके निर्णय कैना अधिकार स्थानीय प्रशासनहे डेले बा । उहे अनुरुप जिल्लाभिटर कोभिड १९ के बढ्टी स्थितिहे मध्यनजर करके संक्रमण फैले नइडेना रोकथाप, नियन्त्रण तथा उपचार सम्बन्धी कार्यहे थप व्यवस्थित ओ प्रभावकारी बनैना निषेधाज्ञा जारी करल प्रमूख जिल्ला अधिकारी भीमप्रसाद भट्टराई जनैलै । प्रशासनसे जारी आदेशमे अत्यावश्य सेवा तथा वस्तु बाहेकके और सक्कु मेरिक उद्योग ब्यापार, व्यवसाय, यातायात बन्द कैना कहल बा ।

निषेधाज्ञाके समयमे औषधि खाध्यवस्तु अन्य अत्यावश्यक उपभोग्यवस्तु तथा सेवा खरिदके काममे बाहेक कौनोफे व्यक्ति घर बाहेर निक्रे नइपैना जनाइल बा । अत्यावश्यक कामके लाग घर बाहेर निक्रे पर्ना अवस्थामे अनिवार्य मास्क सेनेटाइजर प्रयोग करे पर्ना ओ तोकल न्यूनतम भौतिक सामाजिक दुरी कायम करे पर्ना कहल बा ।

दैनिक उपभोग्यवस्तु खाद्यान्न, मासु पसल, डेरी, टिना फलफुल पसल सकारे ६ बजे से १० बजे सम दैनिक ४ घण्टा केल स्वास्थ्य सुरक्षाके मापदण्ड पालना करटी भौतिक दुरी कायम करके सञ्चालन हुइना जनागिल बा । यिहे क्रममे जिल्लाभिटर सक्कु मेरिक निजी तथा सार्वजनिक यातायातके साधनमे समेत रोक लगाइल बा ।

जिल्लामे मेला, पर्व, जात्रा, आमभेला, सभा सम्मेलन भेलामे समेत रोक लगाइल बा । प्रशासनसे निषेधाज्ञाके उल्लंघन करुइया उप्पर रोग संक्रमक ऐन २०२० तथा अन्य प्रचलित कानुन बमोजिम कारबाही आघे बह्रैना जनैले बा । जारी आदेशमे जिल्लामे अत्यावस्यक उपभोग्य वस्तु तथा सेवाके आपूर्तिमे कृत्रिम अभाव सृजना कैना, मुल्यबृद्धि कैना, जम्माखोरी कैना वा नुकैना, सहज आपूर्तिमे अवरोध करुइयाहे कानून बमोजिम कारबाही कैना उल्लेख बा ।