संसद्से प्रधानमन्त्रीहे कारवाही करब : भीम रावल
पहुरा समाचारदाता
धनगढी, १२ फागुन । नेपाल कम्युनिस्ट पार्टी (नेकपा) प्रचण्ड–नेपाल समूहके नेता तथा सुदूरपश्चिम प्रदेश इन्चार्ज भीम रावल प्रधानमन्त्री केपी शर्मा ओली तुरुन्त प्रधानमन्त्री पदसे राजीनामा डेहे पर्ना माग करले बाटै ।
धनगढीमे बुधके पत्रकार सम्मेलनके आयोजना कैटी नेता रावल प्रधानमन्त्री नैतिकताके आधारमे तुरुन्त राजीनामा डेहे पर्ना औंल्याइलै । उहाँ सर्वोच्चसे जनताके पक्षमे फैसला करल ओरसे सक्कु जनताहुक्रनके जीत हुइल बटैलै ।
‘जनताके पक्षमा सर्वोच्चसे फैसला करले बा,’ नेता रावल कहलै, ‘नैतिकताके आधारमे राजीनामा डेहे परल मने ओली ओइसीक राजीनामा नैडिही, १३ दिनभित्रे संसद शुरू हुइ, हम्रे संसद्से ओलीहे कारवाही करब ।’
ओस्टके नेता रावल ओलीके पक्षमे रहलहुक्रनहे मूलधारमे अइना आग्रह करलै ।
ओहे कार्यक्रममे नेता रावल प्रधानमन्त्री ओली आत्मआलोचना कैके जनतासामु माफी मँग्लेसे आपन समूह सकारात्मक हुइ सेक्ना फेन बटैलै । नेता रावल कहलै–‘ अंसैवधानिक कदमके आत्मआलोचना कैके प्रधानमन्त्रीसे राजीनामा डेलेसे ओलीप्रति पार्टी सकारात्मक हुइ सेकी ।’
नेता रावल १३ दिनभित्रे संसद बैठक बोलैना सर्वोच्चके आदेश वमोजिम प्रतिनिधि सभा आघे बह्रना बटैले बाटै । ‘अब्बेक अवस्थामे सरकार गठन कैनासे फेन लोकतन्त्रके रक्षा कैना प्रमुख हो’ उहाँ कहलै ।
