अत्तरिया उवासंघसे प्रजिअ रिजालहे स्वागत
पहुरा समाचारदाता
धनगढी, ५ चैत । कैलालीके प्रमुख जिल्ला अधिकारी खगेन्द्रप्रसाद रिजालहे अत्तरिया उद्योग बणिज्य संघ स्वागत करले बा ।
कैलाली सरुवा होके आइल उहाँहे स्वागत करल हो । संघसे आयोजना करल स्वागत तथा परिचयात्मक कार्यक्रममे प्रमुख जिल्ला अधिकारी रिजाल उद्योग व्यवसायीनसे सुमधुर सम्बन्ध बनाके अपने आघे बह्रना बटैले बाटै । उहाँ राज्यके शक्ति कहलक निजि क्षेत्र रहल ओरसे निजि क्षेत्र ओ राज्य विच तालमेल मिल्न आवश्यक रहल बटैलै ।
कार्यक्रममे बोल्टी अत्तरिया उद्योग वाणिज्य संघके अध्यक्ष अशोक राज देवकोटा निजि क्षेत्र ओ प्रशासन बिच मजा रहना बटैलै ।
प्रमुख जिल्ला अधिकारी रिजालके स्वागत तथा व्यवसायिहुक्रने बिच परिचयात्मक कार्यक्रममे सुदूरपश्चिम ट्राफिक प्रहरी कार्यालय अत्तरियाके प्रमुख बामदेव गौतम, नेपाल उद्योग वाणिज्य महासंघके केन्द्रिय सदस्य कल्पना गैरे, अत्तरिया उद्योग वाणिज्य संघके निवर्तमान अध्यक्ष बसन्त रोकाया, अत्तरिया उद्योग वाणिज्य संघके पदाधिकारी, निजी क्षेत्रमे आवद्ध व्यवसायीहुक्रनके सहभागिता रहल रहे ।
