थारू वाङ्गमयमे योगदान पुगुइया स्रष्टाहे सम्मान
पहुरा समाचारदाता
धनगढी, ८ चैत । थारू लेखक संघ नेपाल धनगढी कैलाली ‘थारू साहित्य पुरस्कार २०७७’ से एकजाने स्रष्टाहे सम्मान कैना हुइल बा ।
शनिच्चरके धनगढीमे बैठल कार्यसमितिके बैठकसे इहे चैत २१ ओ २२ गते सुर्खेतमे हुइना पाँचौ राष्ट्रिय थारू साहित्य सम्मेलनमे स्रष्टाहे सम्मान कैना जनैले बा । संघसे स्थापना करल अक्षय कोषके ब्याज रकमसे नगद पुरस्कार सहित प्रमाणपत्रसे सम्मान कैना जनाइल बा । संघके अध्यक्ष सीताराम चौधरी पहिल बरस नगद ११ हजार १११ सहित एक जाने थारु स्रष्टाहे सम्मान कैना बटैलै ।
बैठकसे संघले प्रदान कैना थारू साहित्य पुरस्कारके लाग डा. कृष्णराज सर्वहारीके संयोजकत्वमे ५ सदस्यीय मूल्यांकन समिति समेत चयन करले बा । जेकर सदस्यमे सुशिल चौधरी (बर्दिया), दिलबहादुर चौधरी (कैलाली), शान्ति चौधरी (बारा) ओ सदस्य सचिव सत्यनारायण चौधरी (कैलाली) रहल बाटै ।
यकर साथे संघसे पुरस्कारके लाग इच्छुक कृतिकारहे इहे चैत १५ गते भिट्टर थारु भाषामे लिखल २०७६ ओ २०७७ सालके कृति मध्ये कौनो १ कृति मनोनय दर्ताके लाग अनुरोध करले बा ।
उहे बैठकसे थारू साहित्य पुररस्कार व्यवस्थापन निर्देशिका २०७७ समेत पारित करले बा । थारू भाषा, साहित्य, कला ओ संस्कृति आदि विधामे कलम चलाके थारू वाङ्गमयमे महत्वपूर्ण योगदान पुगुइया लेखक, स्रष्टा, साहित्यकार, कलाकार एवं अनुसन्धान कर्ताहे सम्मान तथा पुरस्कार प्रदान कैना उद्देश्यसे संघ २ लाख ३५ हजारके अक्षय कोष स्थापना करले बा । उहे अक्षय कोषके वार्षिक ब्याजके कम्तीमे २५ प्रतिशत रकमसे प्रत्येक बरस एकजाने स्रष्टाहे सम्मान कैना अध्यक्ष चौधरी बटैलै ।
संघसे जारी करल निर्देशिका अनुसार प्रकाशित कृति आघेक बरसके हुइ पर्ना, मूल्यांकन समितिसे तोकल समयभित्रे स्रष्टा आपन कृति तथा पाण्डुलिपीहे उपलब्ध कराइ पर्र्ना, कृति थारू भाषामे प्रकाशित हुइल, मूल्यांकन प्रक्रियामे देश तथा विदेशमे रल थारू भाषा, साहित्यसे सम्बन्धित जौनसुके विधाहे समावेश कराजैना मने विवादित कृतिहे मूल्यांकन प्रक्रियामे समावेश नैकरैना उल्लेख रहल बा ।
ओस्टके कृति मनोनयन दर्ताके लाग कार्य समितिसे प्रकाशित करल सूचना तथा समयावधि भिट्टर कृति दर्ता करसेके पर्र्ना, कृति मनोनय दर्ता करेबर कृति प्रकाशित हुइल वर्ष, पृष्ठ संख्या, मूल्य, विधा, प्रकाशक, कृतिके सर्वाधिकार, लेखकके परिचय स्पष्ट रुपमे उल्लेख करे पर्र्ना संघके सचिव सत्यनारायण दहित बटैलै ।
