कैलारीहे वैशाखभित्रे छुवाछुत मुक्त कैना घोषणा

नरेन्द्र चौधरी
हसुलिया, ९ चैत । कैलाली जिल्लाके कैलारी गाउँपालिकाहे बैशाख मसान्तभिटरे छुवाछुत मुक्त गाउँपालिका बनैना घोषणा कैगिल बा ।

५६ औ अन्तर्राष्ट्रिय जतीय विभेद उन्मुलन दिवसके अवसरमे आयोजित रयाली तथा अन्तरक्रिया कार्यक्रममे उ घोषणा करल हो । जातिवादके बिरुद्ध युवा कना मुल नाराके साथ कैलारी गाउँ पालिका वडा नम्बर १ हसुलिया बजारमे निकारल र्‍यालीपाछे कैगिल अन्तरक्रिया कार्यक्रम वडका पहुना रहल गाउँपालिका अध्यक्ष लाजुराम चौधरी उ घोषणा करल रहिट । कार्यक्रममे बोल्टी उहाँ कहलै, ‘यी संसारमे सक्कु मानव अक्के हुइट, मने भेदभाव काहे, हम्रे गाउँपालिकाहे बैशाख मसान्तभिटरे छुवाछुट मुक्त घोषणा करब ।’

एक मनै दुसर मनैनहे हेर्ना दुष्टिकोण, मनैनके अन्ध विश्वासहे हटाई परठ, मनै पुरान सोच विचार परम्पराहे परिवर्तन करलेसे केल जातीय विभेद ओ छुवाछुत अन्त्य हुई ।

कार्यक्रमके विशिष्ट पहुना गाउँपालिका उपाध्यक्ष जातीय विभेद, छुवाछुत अपने पारिवारसे सुरु हुइटी समाजसम्म जैटी रहल बटैली । उहाँ कहली, विभेद घरसे हटैलेसे केल अन्त्य हुई ।

सरकारी वकिल कार्यालयके सहायक न्यायधिवक्ता सुर परियार भेदभाव विरुद्ध बनल नीति ऐन कानून कार्यान्वयन करे पर्ना बटैली । उहाँ कहलै, मनैनके चेतनाके कमिसे जातिय विभेद केल नइहुके सास्कृतिमेफे विभेद हुइटी रहल बा ।

कार्यक्रममे वडा ५ के अध्यक्ष विषणु चौधरी, इन्सेकके कृष्ण विक, दलित महिला अधिकार मञ्चके अध्यक्ष सवित्रा घिमिरे, जागृति महिला सहकारी सचिव टीका भुल, लक्ष्मी भुल लगायत मन्तव्य व्यक्त करले रहिट । उहे विच जेहेन्दार ओ असहाय दस जाने विद्यार्थीहे शैक्षिक समाग्रीहे वितरण करल बा । दुई जाने एसईई परीक्षामे मजा नतिजा नानके पास हुइल विद्यार्थीहे दोसल्लासहित सम्मान करले रहिट ।

दलित सञ्जालके अध्यक्ष दिपक सुनारके अध्यक्षतामे हुइल कार्यक्रममे स्वागत सस्थाके सचिव भीम बहादुर तिरुवा ओ सञ्चालन जनक भुल करले रहिट । कैलारी गाउँपालिका ओ दलित सञ्जाल कैलारी गाउँ पालिका, कैलारी स्मार्ट समन्वय क्लव हसुलियाके सयुक्त आयोजनामे इन्सेक नेपाल, दलित महिला अधिकार मञ्च, दलित एकता जारण नेपाल ओ और संघसस्थाके अर्थिक सहयोगमे अँटवारके दिनमे भव्यताके साथमे कार्यक्रम करले बा । कार्यक्रममे टमान सघसस्थाके ओ राजनितिक दलके उपस्थिति रहिट ।

ओस्टेक करके ५६ औं अन्तर्राष्ट्रिय जातीय विभेद उन्मूलन दिवसके अवसरमे अँट्वारके रोज धनगढीमे प्रभातफेरी कैगिल बा ।

प्रभातफेरी धनगढी ट्राफिक चौराहासे सुरु हुके पार्कमोडमे पुगके कोण सभामे परिणत हुइल रहे । कोण सभामे संविधान सभा सदस्य हरि श्रीपाइली, धनगढी उपमहानगरपालिकाके उपप्रमुख सुशीला मिश्र भट्ट, राष्ट्रिय मानव अधिकार आयोगके सुदूरपश्चिम संयोजक मोहन जोशी लगायत सम्बोधन करले रहिट । नेपालके संविधान २०७२ के मौलिक हकके धारा २४ मे छुवाछुत तथा भेदभाव विरुद्धके हकके व्यवस्था करले बा ।