गोली लागके घाहिल हुइलके अवस्था जटिल

पहुरा समाचारदाता
धनगढी, १० चैत । बसके ठक्करसे युवतीके मृत्यु हुइलपाछे तनावग्रस्त बनल कैलालीके लम्कीमे प्रहरीसे चलाइल गोली लागके २ जाने घाहिल हुइल बाटै । गोली लागके उहे ठाउँके ३० वर्षीय कृष्ण प्याकुरेल ओ १८ वर्षीय दिपक सन्ज्याल घाहिल हुइल बाटै ।

गोरामे गोली लागके दिपक सामान्य बाटै कलेसे पेटमे गोली लागके कृष्णके अवस्था भर जटिल रहल जनाइल बा । ओहकान थप उपचारके लाग काठमाण्डौं पठाइल बा । जिल्ला प्रहरी कार्यालय कैलालीके प्रहरी निरीक्षक हिक्मत थापा प्रदर्शनकारी ईलाका प्रहरी कार्यालय लम्की घेराउ करे खोजेबर भिडहे तितर–बितर करक लाग हवाई फायर करल बटैलै ।

मंगरके सकारे पूर्वपश्चिम राजमार्ग अन्तरगत लम्की चोकस्थित टीकापुर ओर जैटी रहल ना ६ ८८३३ नम्बरके बसके ठक्करसे पैदल यात्री लम्कीचुहा नगरपालिका–१ के २२ वर्षीया कमला देवकोटाके मृत्यु हुइल रहे । ठक्कर डेहुइया बस ओ चालक बर्दोगोरिया गाउँपालिका–१ के ३१ वर्षीय पुष्प कडेलहे नियन्त्रणमे लेके अनुसन्धान करटी रहल प्रहरी जनैले बा ।