सुरक्षित मातृत्व तथा प्रजनन स्वास्थ्य अधिकार अन्तरक्रिया
पहुरा समाचारदाता
धनगढी, १२ चैत । सुरक्षित मातृत्व तथा प्रजनन स्वास्थ्य अधिकार सम्बन्धमे सरोकारवाला निकायके प्रतिनिधिहुकनसंग अन्तरक्रिया हुइल बा ।
आइपास नेपालके सहयोग महिला कानून र विकास मञ्चके आयोजनामे बुधके रोज धनगढीमे हुइल कार्यक्रममे महिला कानून र विकास मञ्चके कार्यकारी निर्देशक सविन श्रेष्ठ यौन तथा प्रजनन स्वास्थ्य अधिकार ओ लैङिक हिंसा, सुरक्षित मातृत्व तथा प्रजनन स्वास्थ्य अधिकार ऐन २०७५ बारे कार्यपत्र प्रस्तुत करले रहिट ।
सुदूरपश्चिम प्रदेश स्वास्थ्य निर्देशनालयके स्वास्थ्य निर्देशक डा. गुणराज अवस्थी सुदूरपश्चिम प्रदेशमे सुरक्षित मातृत्व तथा प्रजनन स्वास्थ्यबारे जानकारी डेहल रहिट । उहाँ प्रजनन स्वास्थ्य अधिकारसे बन्चितिकरण कैनाफे लैङिक हिंसा रहल बटैलै ।
प्रदेशमे लिङ पहिचान करके गर्भपतन करुइयाहे संख्या बह्रल कहटी भ्रुण अपराध ओ गैरकानूनी रहल डा. अवस्थी बटैलै । सुदूरपश्चिम प्रदेशमे बार्षिक ६२ हजार बच्चा जलमलमे १० हजार लउण्डी ओ ५२ हजार लउण्डा रहल बटैलै । कोरोना फेरसे लौटल ओरसे सजग रहनाफे उहाँ आग्रह करलै ।
कार्यक्रममे माधवी बज्रचार्य यौन तथा प्रजनन स्वास्थ्य अधिकार ओ लैङिक हिंसा, सुरक्षित मातृत्व तथा प्रजनन स्वास्थ्य अधिकारबारे प्रस्तुती करल रहिट । ओस्टेक आइपस नेपालके प्रदेश संयोजक प्रदीप अर्याल आइपससे सुदूरपश्चिम प्रदेशके अछाम, डोटी, डडेल्धुरा ओ बाजुरा जिल्लामे करल कार्यक्रमबारे जानकारी डेहल रहिट ।
कार्यक्रमे सेती प्रादेशिक अस्पतालके ओसिएमसी फोकल पर्सन यशोदा ढकाल अस्पतालमे कम उमेरके ढेर जैसिन लउण्डी गर्भपतन कराई अइटी रहल जनैली । बलात्कार हुइल महिनौ दिनपाछे चेकजाँच कराई आइलपाछे पीडित न्यायसे बन्चित हुइल उहाँ जनैली ।
कार्यक्रममे सहजीकरण महिला कानून र विकास मञ्चके कार्यक्रम व्यवस्थापक नबिनकुमार श्रेष्ठ करले रहिट ।
अन्तरक्रिया कार्यक्रममे मञ्चके जिल्ला संयोजक रेणुप्रधान श्रेष्ठ, महिला अधिकार, मानव अधिकारके क्षेत्रमे काम करटी आइल टमान संघ संस्थाके प्रतिनिधिहुकनके सहभागिता रहल रहे ।
