मानव अधिकार उलंघनके घटनामे कमी नइआइलः मुख्यमन्त्री भट्ट

पहुरा समाचारदाता
धनगढी, १२ चैत । सुदूरपश्चिम प्रदेशके मुख्यमन्त्री त्रिलोचन भट्ट प्रदेशमे गरिबी, अशिक्षा, पहुँच नैरना, अर्थलगायतके कारणसे मानव अधिकार उलंघनके घटना न्यूनीकरण हुइ नैसेकल बटैलै बाटैं ।
राष्ट्रिय मानव अधिकार आयोग सुदूरपश्चिम कार्यालयसे बिफेक रोज धनगढीमे हुइल सुदूरपश्चिम प्रदेश सरकार ओ सुरक्षा निकायसँग मानव अधिकारसम्बन्धी छलफल कार्यक्रममे मुख्यमन्त्री भट्ट समाजमे हुइटी रहल घटनाके विश्लेषण करके मानव अधिकारके घटना न्यूनीकरण करे सेक्ना बटैलैं । उहाँ मानव अधिकार हननके घटना न्यूनीकरण करेक लाग प्रदेश सरकार प्रतिवद्ध रहल बटैलैं । किहुहे फेन मानव अधिकार डेहेबेर औरेक अधिकारके सुरक्षाके फेन ख्याल करेपरना उहाँ कलैं ।
सुदूरपश्चिम प्रदेशके विद्यायन समितिके सभापति नेपालु चौधरी मानव अधिकार सुरक्षाके लाग प्रदेश सरकार कानून नानके आघे बह्रना बटैलैं । प्रदेश सरकारसे नानल उ कानून कार्यान्वयन करना फेन उहाँ प्रतिवद्धता व्यक्त करलैं ।
प्रदेश प्रहरी प्रमुख प्रहरी नायव महानिरिक्षक उत्तमराज सुवेदी सुदूरपश्चिम प्रदेशमे शान्ति सुरक्षाके अवस्था ओ मानव अधिकारबारे कार्यपत्र प्रस्तुत करटी बड्लटी राजनीतिक परिवेशसे सिर्जित घटनाक्रमके विकाससे सुरक्षामे चुनौती ठपल बटैलैं । उहाँ प्रायःजैसिन डेखा परल अपराध ओ घटना राजनीतिकरणहुके प्रभावित हुइना बटैलैं । उहाँ कहलै, मादक पदार्थ ओ लागूऔषधके दुव्र्यसनी, सामाजिक सञ्जालके दुरुपयोगके कारण अपराधिक घटना बह्रल बा । अस्टेक, न्यायमे पहुँच नैहुके, आधारभूत आवश्यकतासमेतसे वञ्चित हुके, बन्द, हडताल, चक्काजामलगायतके कारण फेन मानव अधिकार उलंघन हुइल प्रहरी नायव महानिरिक्षक सुवेदी बटैलैं । उहाँ फौजदारी कानून कार्यान्वयनके अवस्थालगायतके बारेमे जानकारी करैले रहिट ।

इन्सेकके सुदूरपश्मिच प्रदेश संयोजक खडकराज जोशी सुदूरपश्चिम प्रदेशमे मानव अधिकारके अवस्था ओ सवाल विषयमे कार्यपत्र प्रस्तुत करले रहिट । कार्यपत्र प्रस्तुत करटी उहाँ द्वन्द्वकालिनके निरन्तरता, संक्रमणकालीन न्यायप्रति सरकार बेवास्ता, राष्ट्रिय मानव अधिकार आयोगके सिफारिस कार्यान्वयनके दुरावस्थाके कारण मानव अधिकारके उलंघन बह्रल बटैलैं ।
उहाँ संविधानसे डेहल मौलिक हक प्राप्तीके लाग तिनु तहसे तदारुकता डेखैलेसे, गम्भीर घटनामे संलग्नहे कानूनी दागरामे नन्ना, दिगो विकासके लक्ष्य हासिल करेक लाग ओहे अन्सार नीति तथा कार्यक्रम नन्लेसे मानव अधिकारके घटना न्यूनीकरण करे सेक्ना बटैलैं । उहाँ विश्वव्यापी समीक्षामे नेपालके सहभागिता ओ जवाफके सवाल, सुदूरपश्चिममे मानव अधिकारके अवस्था, आर्थिक सामाजिक तथा सांस्कृतिक अधिकारके अवस्था, सुरक्षाके सवालबारे जानकारी करैले रहैं ।
राष्ट्रिय मानव अधिकार आयोग सुदूरपश्चिम प्रदेश प्रमुख मोहनदेव जोशी सुदूरपश्चिम प्रदेश सरकार ओ सुरक्षा निकायसँग मानव अधिकारसम्बन्धी छलफल कार्यक्रमबारे कार्यपत्र प्रस्तुत करले रहिट । कार्यक्रममे उहाँ मानव अधिकार तथा मानवीय कानून सम्बन्धी राष्ट्रिय तथा अन्तर्राष्ट्रिय प्रतिवद्धताके कार्यान्वयन करलेसे मानव अधिकार उलंघनके घटना कम हुइना बटैलैं । उहाँ मानव अधिकार सम्मान, संरक्षण ओ सम्वद्र्धन करटी विधिके शासन कायम करटी संविधानमे तर्जुमा करल कानून कार्यान्वयनमे जोड डेलैं ।
कार्यक्रममे कैलालीके प्रमुख जिल्ला अधिकारी खगेन्द्रप्रसाद रिजाल, नेपाल बार एशोसिएशनके अध्यक्ष सिद्धराज ओझा, फाया नेपालके अध्यक्ष शेरबहादुर बस्नेत, नेपाल पत्रकार महासंघ सुदूरपश्चिमके अध्यक्ष अर्जुन शाह, पत्रकार चित्रांग थापा लगायतसे मानव अधिकारके बारेमे अपन मन्तव्य व्यक्त करले रहैं ।
