फोनिजसे महासंघके लाग आधिकारिक उम्मेदवार घोषणा

पहुरा समाचारदाता
धनगढी, १२ चैत । नेपाल पत्रकार महासंघके यिहे चैत २५ गते हुइना आसन्न अधिवेशनके लाग नेपाल आदिवासी जनजाति पत्रकार महासंघ (फोनिज) कैलाली बिफेक रोज आधिकारिक उम्मेदवार घोषणा करले बा ।

निर्वाचनके कार्यतालिका सार्वजनिक हुइलसँगे अविधेशनके लाग माहोल टटुल हुइल बेला फोनिज उ आधिकारिक उम्मेदवार घोषणा करल हो ।

महासंघके चुनावके लाग रणनीतिक निर्णय करटी फोनिज कैलाली जिल्ला अध्यक्षके लाग नेपाल पत्रकार महासंघके तीन चो केन्द्रीय पार्षद हुसेकल ओ एकचो जिल्ला कार्यसमितिके सहसचिव हुसेकल थारु पत्रकारसंघ कैलालीके अध्यक्ष तथा पहुरा थारु दैनिकके सम्पादक प्रेम चौधरीहे आघे सर्ना निर्णय करले बा । अस्टेक जिल्ला सहसचिवमे दिनेशकुमार चौधरी ओ सदस्यमे दुर्जनकुमार चौधरीहे आघे सारल बा ।

अस्टेक महासंघके प्रदेश समितिमे थारु पत्रकार संघके केन्द्रीय उपाध्यक्ष तथा केर्नी न्यूज डटकमके सम्पादक कालीमैया कुमारी चौधरी (उन्नती) हे महिला उपाध्यक्षमे आघे सर्ना निर्णय करले बा ।

अस्टेक फोनिज प्रदेश अध्यक्ष तथा जनता टेलिभिजनके सुदूरपश्चिम ब्यूरो इन्चार्ज भीम चौधरीहे सचिव, फोनिज कैलालीके अध्यक्ष तथा दिनेशखबरके सम्पादक रामलखन चौधरीहे कार्यसमितिके पदाधिकारीमे ओ नेपाल पत्रकार महासंघके जिल्ला सहसचिव समेत रहल फोनिजके जिल्ला सचिव तथा कैलारी अनलाईनके सम्पादक, पहुरा दैनिकका कार्यकारी सम्पादक राम दहितहे सदस्यमे उम्मेदवार घोषणा करना निर्णय करल हो ।

बैठकसे नेपाल पत्रकार महासंघके २०७७ चैत ९ गते प्रकाशित अन्तिम सदस्यता नामावलीमे जिल्ला कार्यसमिति सदस्य ठागुराम कठरिया, रविना चौधरीसहित ९ जाने आदिवासी जनजाति पत्रकारहुकनके सदस्यता खारेज करलप्रति थारु पत्रकार संघ केन्द्रीय समिति, थारु पत्रकार संघ जिल्ला कार्यसमिति, फोनिज सुदूरपश्चिम प्रदेश ओ फोनिज कैलालीसे महासंघके उ निर्णयके विरोधमे संयुक्त प्रेस विज्ञप्ति जारी करके ध्यानाकर्षण करना निर्णय करले बा ।

नेपाल पत्रकार महासंघ कैलालीके क्रियाशील सदस्यमे २७ जाने थारु पत्रकार रहै । अन्तिम सदस्यता नामावली प्रकाशित करेबेर ९ जानेहे क्रियाशील सदस्यतासे हटाइल बा । ओ, उ प्रकाशित नामावलीमे ४ जाने थारु पत्रकार नयाँ सदस्यता थपके २२ जाने सदस्य बाटैं ।

अस्टेक नेपाल पत्रकार महासंघ कैलालीके कार्यसमिति सदस्य टिआर कठरिया अपनहे आधिकारिक जानकारी बिना क्रियाशील सदस्यसे नाम हटाइल महासंघके निर्णयप्रति अपत्ति जनैटी बिफेक रोज महासंघके कार्यलयमे तालाबन्दी करले बाटैं ।

उहाँ कलैं, ‘मै जिल्ला कार्यसमितिमे बाटु, केन्द्रमे निर्वाचनके लाग आधिकारिक नाम पठाइबेर हमार सबसंग छलफल करेपरना हो, मने नैकरगिल ।’ एकलौटीरुपमे नामावली पठाइलमे प्रेस विज्ञप्ति मार्फत कठरिया घोर आपत्ति जनैले बाटैं ।