विदेशमे सिखल सीप स्वदेशमे लगैना आग्रह
पहुरा समाचारदाता
धनगढी,१२ चैत । सुदूरपश्चिम प्रदेशके सामाजिक विकास समितिके सभापति कुन्ती जोशी विदेशमे सिखल सीप स्वदेशमे लगैना आग्रह करले बटी ।
ओरेक नेपाल, कैलालीसे विफेक रोज धनगढीमे आयोजित ‘वैदेशिक रोजगारसे लौटल व्यक्तिहुकने समस्या तथा चुनौती’ विषयक सरोकारवालाहुकनसंग करल अन्तरक्रिया कार्यक्रममे उहाँ उ बाट बत्वाइल हुइट ।
‘विदेशमे एक/दुई बरस कमाके फेरसे स्वदेश लौटही परी, उहाँ कहली, उहाँसे सिखल सीप स्वदेशमे लगैलेसे उहीसे कम मेहनत करके ढेर कमाई सेक्नाई ।’ दक्षता अनुसार काम करलेसे प्रदेश सरकार जैसिनफे सहयोग कैना उहाँ प्रतिबद्धता जनैली ।
उहाँ कहली, सेकटसम अपने देशमे काम करी, जाई परलेसे सीप सीखके बैधानिक डगर जाईपर्ना सभापति सुझाव डेली ।
राष्ट्रिय मानव अधिकार आयोगके सुदूरपश्चिम प्रदेश प्रमुख मोहन जोशी प्रदेश सरकारहे कानून बनाईबेर रोजगारीसे लौटल व्यक्तिहुकनहे समेटके स्वदेशमे काम कैना बातावरण बनाई पर्ना बटैले । विदेशसे लौटल महिलाहुकनहे समाजमे पुनस्र्थापना हुइना कर्रा हुइना ओरसे सरकारसे मजा बातावरण बनाई पर्नामे उहाँ जोड डेलै ।
श्रम तथा रोजगार कार्यालय धनगढीके जयदेव विष्ट श्रम स्वीकृत लेके बैदेशिक रोजगारमे जउइयाके संख्यामे कमी आइल बटैलै । उहाँ कहलै, आर्थिक बर्ष २०७५/०७६मे १५ सय २९ जाने, २०७६/०७७ सालमे ३२ सय जाने ओ चालु र्आिर्थक बर्षमे ५९६ जाने केल वैदेशिक रोजगारके लाग श्रम स्वीकृति लेले बटै । बैदेशिक रोजगारमे जाई अपनही लापारवाही करल कारण दुःख झेलल उहाँ कहलै ।
जिल्ला बारके अध्यक्ष सिद्धराज ओझा फ्रि भीस फ्रि टिकट कार्यान्वयन नइहुइल बटैलै । बैदेशिक रोजगारमे ठगुवाहुकनके लाग लाग बारसे निशुल्क कानूनी सेवा डेना उहाँ बटैलै । वैदेशिक रोजगारके लाग भारतिय डगर गैल कारण ढेर जैसिन नेपाली दुःख पाइल ओ ठगुवा पाइल बटैलै ।
कार्यक्रममे ओरेक नेपालके कार्यक्रम संयोजक सृष्टि कोलाक्छेपति वैदेशिक रोजगारसे लौटल व्यक्तिहुकनहे समस्या ओ चुनौती विषयक कार्यपत्र प्रस्तुत करले रहिट । ओरेक नेपाल कैलाली जिल्ला संयोजक विनु रानाजोशीके अध्यक्षतामे हुइल कार्यक्रममे सहजीकरण जिल्ला कार्यक्रम संयोजक गीता चौधरी करले रहिट । कार्यक्रममे वैदेशिक रोजगारसे लौटल टमान डिडीबाबुहुक्रे अपने भोगे परल समस्याबारे अपन बाट दर्शले रहिट ।
