कृषकहे अनुदानमे मेसिनरी उपकरण
पहुरा समाचारदाता
सुखड, १३ चैत । कैलालीमे कृषकहे अनुदानमे मेसिनरी उपकरण वितरण करल बा । जिल्लाके घोडाघोडी नगरपालिका ३ स्थित इभर ग्रिन कृषि सहकारी संस्थासे कृषकहे ५० प्रतिशत अनुदानमे मेसिनरी उपकरण पावर टिलर, रिपर ,बिउँ बिजन लगायत टमान सामाग्री उपलब्ध कराइल हो ।
कृषि ज्ञान केन्द्र कैलालीके सहयोग ओ मुख्यमन्त्री नमुना कृषि गाउँ खाद्यान्न बिउ उत्पादन समितिसे कृषकहुक्रनहे कृषि यन्त्र वितरण करल हो । करिब १ करोड ५० लाख अनुदानमे पावर टिलर ५०, रिपर १६, पानी मोटर १०, स्प्रे टंकी २ सय ५० ओ उन्नत जात धानके बिया ३० कुण्टल उपलब्ध कराइल हो । वडा नम्बर २, ३ ओ ५ के इभर ग्रिन कृषि सहकारी संस्थाके कुछ सेयर सदस्य ओ कृषकहुक्रनहे वितरण करल हो ।
भूमि व्यवस्थापन, कृषि तथा सहकारी मन्त्री विनीता चौधरी एक कार्यक्रमके बिच मेसिनरी सामान हस्तान्तरण करल रहिट । कार्यक्रममे वडा नम्बर ३ के वडा अध्यक्ष कमल थारु, वडा नम्बर ५ के वडा अध्यक्ष प्रेम रोकाया, कृषि ज्ञान केन्द्र कैलालीके प्रमुख खगेन्द्र शर्मा लगायत टमान व्यक्तित्वहुक्रनके सहभागिता रहल रहे ।
