विकासके योजनाहे सुधारे पर्नामे जोड
पहुरा समाचारदाता
धनगढी, १३ चैत । सुदूरपश्चिम प्रदेशके सामाजिक विकास मन्त्री कृष्णराज सुवेदी स्थानीय तहके विकासके योजना लक्ष्यमे पुगाइक लाग विकासके योजनाहे सुधारके लैजाइ परना बटैले बटैं ।
जिल्ला समन्वय समिति कैलालीके शुकके रोज धनगढीमे हुइल आर्थिक वर्ष २०७६/०७७ मे सञ्चालित योजना तथा वार्षिक समीक्षा गोष्ठीमे मन्त्री सुवेदी विकासके योजनामे हुइल कमि कमजोरीहे सुधारके लैगिलेसे लक्ष्यमे पुग्ना सहयोग हुइना बटैलैं । स्थानीय तह टमान विकासके योजना सफल हुइलमे प्रसंसा करटी उहाँ स्थानीय तहके विकासके लाग प्रदेश सरकार समन्वय ओ सहकार्य करना प्रतिवद्धता व्यक्त करलैं ।
कार्यक्रममे कैलाली जिल्लाके १३ स्थानीय तह ओ जिल्ला समन्वय समितिसे आवद्ध परियोजनासे वार्षिक प्रगति प्रतिवेदन प्रस्तुत करल रहे । धनगढी उपमहानगरपालिकाके प्रमुख प्रशासकीय अधिकृत हरिबहादुर चन्द वार्षिक प्रगति प्रतिवेदन प्रस्तुत करटी उपमहानगरपालिका ७३ प्रतिशत काम करल जानकारी करैलैं । उहाँ धनगढी उपमहानगरपालिकाके राजस्व लक्ष्य ओ संकलन, स्वास्थ्य, शिक्षा, विकासके योजना, पालिकाके उपलब्धीबारे जानकारी करैले रहैं ।
कार्यक्रममे टीकापुर नगरपालिकाके प्रमुख प्रशासकीय अधिकृत मोहनप्रसाद अर्याल, घोडाघोडी नगरपालिकाके प्रशासकीय अधिकृत खगेन्द्रबहादुर सिंह, भजनी नगरपालिकाके प्रशासकीय अधिकृत धर्मराज विनाडी, लम्कीचुहा नगरपालिकाके प्रमुख प्रशासकीय अधिकृत विक्रम चौधरी आपन आपन पालिकाके वार्षिक प्रगति प्रतिवेदन प्रस्तुत करले रहैं ।
ओस्टेक, कैलारी गाउँपालिकाके सामाजिक विकास अधिकृत यगम कडेल, बर्दगोरिया गाउँपालिकाके गोविन्द विक, मोहन्याल गाउँपालिकाके नारायणप्रसाद शर्मा, जोशीपुर गाउँपालिकाके कमलराज उपाध्याय पालिकाके वार्षिक प्रगति प्रतिवेदन प्रस्तुत करले रहैं ।
प्रधानमन्त्री कृषि आधुनिकीकरण परियोजनाके वार्षिक प्रगति प्रतिवेदन परियोजनाके कृषि अधिकृत हरिप्रसाद पाण्डे प्रस्तुत करले रहैं । गोष्ठीमे सहरी विकास तथा भवन निर्माण कार्यालय ओ घरेलु तथा साना उद्योग कार्यालयके फेन वार्षिक प्रगति प्रतिवेदन प्रस्तुत करल रहे ।
जिल्ला समन्वय समिति कैलालीके सभापति सूर्यबहादुर थापाके अध्यक्षतामे हुइल कार्यक्रममे स्वागत उपप्रमुख सुन्दरीदेवी चौधरी करले रही ।
