माग सम्बोधन नैहुइलेसे सशक्त आन्दोलन कैना
पहुरा समाचारदाता
धनगढी, १३ चैत । टीकापुर जेलबन्दी परिवार रिहाइके लाग सांसद रेशम लाल चौधरीके संयोजत्वमे ६ जनहनके वार्ता टोली गठन करले बावै ।
टीकापुर मुद्दामे अदालतसे जेल सजाय सुनाइलपाछे जेल जीवन बिटैटी रहल सांसद चौधरीके संयोजकत्वमे थरुहट नेता लक्ष्मण थारु, रामप्रसाद चौधरी, चुन्नी चौधरी, बिना चौधरी ओ यमुना चौधरीके नेतृत्वमे वार्ता टोली गठन करल हो ।
उच्च अदालत दिपायलके फैसलापाछे अर्धभूमिगत रहल मोर्चाके केन्द्रीय संयोजक लक्ष्मण थारु शुकके पत्रकार सम्मेलन कैटी टीकापुर राजबन्दीके ओरसे वार्ता टोली गठन करल जानकारी डेलै ।
उहाँ थारुनके १४ बुँदे राजनीतिक मुद्दाहे अब्बेक वार्तामे थाती राखके टीकापुर घटनाके झुटा मुद्दा खारेजी ओ जेलमे रहलहे रिहाइके विषयमे किल वार्ता कैना तयार रहल बटैलै । वार्ता टोलीके गठनसंगे शुकके बैठल बैठकसे चैत २० गते भिट्टर सामूहिक रुपमे सर्वाेच्च अदालतमे न्याय प्राप्तिे लाग जैना निर्णय करल उहाँ बटैलै ।
‘जिल्ला अदालतसे फेन पूर्ण न्याय नैपाइल अवस्थामे उच्च अदालतसे नस्लियत करल अन्यायपूर्ण फैसला करल,’ उहाँ कहलै, ‘यकर विरुद्ध सामूहिक रुपमे सर्वाेच्व अदालतमे जाने निर्णय करले बाटी ।’
टीकापुर घटनामे रेशम चौधरीसहित ७ जाने जेल सजाय भोग्टी रहल बाटै । लक्ष्मण थारुसहित १८ जाने उच्च अदालतके फैसलासे दोषी करार ठहर करले बा ।
ओस्टके थरुहट÷थारुवान आन्दोलनसे उठान करल मुद्दा ओ टीकापुर मुद्दाहे सम्बोधनके लाग संघर्षरत सक्कु पक्षहे धन्यवाद ज्ञापन कैना निर्णय करले बा । कलेसे १ महिनाभित्रे आपनहुक्रनके माग सम्बोधन नैहुइटसम मोर्चासे सक्कु जनहनसे समन्वय कैटी सरकार विरुद्ध सशक्त आन्दोलनमे जैना चेतावनी समेत डेलै ।
‘हम्रे वार्ताके, न्यायके ओ दबाबके माध्यमसे टीकापुर विद्रोहसे उत्पन्न समस्याके समाधान खोज्टी रहल बाटी,’ उहाँ कहलै, ‘मने सरकार गम्भीर नैहुइ कलेसे यकर परिणाम सरकारसे भोग्ही परी कहटी एक महिनाके समय डेले बाटी ।’ उहाँ टीकापुर घटनाके मुद्दा फिर्ता नैहुइटसम सक्कु आन्दोलनहे जारी रख्ना बटैलै ।
‘सरकारमे जैना सिँढी नबने’
टीकापुर आन्दोलनसे उत्पन्न समस्या समाधानके दृष्टिकोणसे सक्कु राजनीतिक दलसे आ–आपन स्तरसे पहल किल कैडेना अनुरोध करटी मोर्चाके संयोजक थारु टीकापुरके घटनाके विषयहे सरकारमे जैना सिँढी किल नैबनैना कहलै । ‘जेलमे रहल रेशमसहित अन्यके रिहाइ ओ झुटा मुद्दा फिर्ताके मागमे अब्बे कांग्रेस, जसपा, माओवादी सक्कु दलसे पहल होए कना चाहना हो,’ उहाँ कहलै, ‘मने कौनो फेन दलसे इहीहे सरकारमे जैना सिँढी किल नबनाइट कना हमार चाहना हो ।’
उहाँ नयाँ सरकार, पुराने सरकार बनैना विषयमे आपनहुक्रनके मुद्दा नैजोरडेना आग्रह करलै । ‘सरकार बन्टी रही । ढल्टी रही,’ उहाँ थप्लै, ‘इहीहे मुख्य मुद्दा बनाके सरकारके सिँढी चहुरना ओ लेनदेनके विषय बनैना काम किल नहोए ।’
जनता समाजवादी पार्टी केपी ओली नेतृत्वके सरकारमे जैना चर्चापाछे वार्ता टोली गठन हुइल कि कना जिज्ञासामे संयोजक थारु कहलै, ‘सरकार तथा सत्ता समिकरणबारे हम्रहीनहे कौनो सरोकार नैहो । हम्रहीनहे अत्रे किल पता बा, टीकापुुर घटना मुद्दासे कोइ सरकार बनैना वा गिरैनासे सरोकार नैराखठ् । झुठा मुद्दा हो, खारेज हुइ परल ।’
