स्वास्थ्य सुरक्षा अपनाके ढुरहेरी मनैना सरकारके आग्रह
पहुरा समाचारदाता
धनगढी, १५ चैत । कोरोना भाइरसके विमारी फेरसे विल्गाइ लागलपाछे रङके पर्व ढुरहेरी स्वास्थ्य सुरक्षा अपनाके ढुरहेरी मनैना सरकारके आग्रह करले बा । फागुन शुक्ल पूर्णिमाके दिन यी पर्व मनैना करजाइठ । अँटवारसे हिमाली एवं पहाडी जिल्लामे ढुरहेरी मनाजाइठ कलेसे सोम्मार ओ मंगरके तराईमे ढेरहेरी मनाजाइठ ।
ढेरहेरी अर्थात फागु पर्व परम्परागतरूपमे टमान रङ ओ लोला खेलके मनैना प्राचीन परम्परा बा । यी बरस हिमाल ओ पहाडमे अँँटवारके ढुरहेरी मनैना हुइलेसेफे तराईंका जिल्लामे भर आज सोम्मार भव्यताके साथ मनाजैना बा ।
खास करके दुई दिन यी पर्व मनैना करलेसेफे यकर औपचारिक सुरुआत भर होलीके चीर ठड्याइल दिनसे हुइठ । यी वर्षफे यही चेत्र ८ गते बसन्तपुरमे चीर ठड्याइल रहे । उ चीरहे अँटवारके टुँडिखेलमे विधिपूर्वक जराजैटी बा । यी वर्ष कोरोनाके दुसरा लहर सुरु हुई सेक्ना कहटी भारी भीडभाड नइकैना ओ स्वास्थ्य सावधानीके उपाय अपनाके केल रङ खेल्न सरकारसे आग्रहसमेत करले बा ।
त्रेता युगमे दैत्यराज हिरण्यकश्यपुसे विष्णुभक्त अपन पुत्र प्रह्लादहे मर्ना उद्देश्यसे ब्रह्मासे आगीसे छुए नइसेक्ना वरदान पाइल अपन बहिनीया होलिकाहे प्रह्लादके साथ बरटी रहल आगीमे पैठे लगाके होलिका अपनही भष्म हुइल मने भक्त प्रह्लादहे आगीसे छुए नइसेकल कथा होली पर्वसंग जोरल बा । उहे बेलासे शक्तिके दुरूपयोग कैना पापी प्रवृत्तिके प्रतीक बनल होलिका मारल उपलक्ष्यमे ढुरहेरी (फागु) खेल्न परम्परा चलल विश्वास करजाइठ ।
प्रशासनसे भीडभाड कैना रोक
कोरोना भाइरस संक्रमण फैले सेक्ना जोखिमहे मध्यनजर कैटी स्थानीय प्रशासन कैलालीसे ढुरहेरी लगायत मेला पर्वमे भीडभाड कैना रोक लगैनाके साथे टमान चीजमे प्रतिबन्धात्मक व्यवस्था लागू कैले बा ।
जिल्ला सुरक्षा समिति ओ जिल्ला कोभिड १९ संकट व्यवस्थापन केन्द्रके बैठकसे स्थानीय प्रशासन ऐनअनुसार कैलालीमे चैत ११ गतेसे औरे व्यवस्था नैहुइटसम उ आदेश जारी करल हो ।
आदेश अनुसार भेला हुइना, जात्रा, पर्व, भीडभाड, महोत्सव, जुलुस, मेला लगाइ नैपैना हो । प्रमुख जिल्ला अधिकारी खगेन्द्रप्रसाद रिजालसे हस्ताक्षरित उ आदेश जारी करल हो । मने कञ्चनपुरमे इहीसे आघे चैत १० गते मंगरके रात १२ बजेसे लागू हुइना मेरके आदेश जारी करल हुइट ।
ओस्टके, कार्यालय, संघ संस्था, शैक्षिक संस्था फेन सामाजिक दूरीलगायत जनस्वास्थ्य सुरक्षाके मापदण्ड पूर्ण रुपमे पालना कैके नियमित रुपमे कार्यालय सञ्चालन कैके सेवा प्रवाह कैना, बैठक गोष्ठी वा सेमिनार भर्चुअल माध्यमसे करे पर्ना, अत्यावश्यक बैठक गोष्ठी वा सेमिनार करे परलेसे जनस्वास्थ्यके मापदण्डके पूर्ण परिपालन करे पर्ना आदेशमा उल्लेख बा ।
जारी आदेशके अवज्ञा कैलेसे संक्रामक रोग ऐन, २०२० बमोजिम कारवाही कैना जिल्ला प्रशासन कार्यालय जनैले बा ।
ओस्टके ढुरहेरीमे भिडभाड नैकैना सर्वसाधरणहे जिल्ला प्रहरी कार्यालय कैलाली आग्रह करले बा । प्रहरीसे एक सुचना निकरटी छिमेकी मुलुक भारतमे कोरोना संक्रमण बह्रटी गैल अवस्थामे जिल्लामे संक्रमणके रोकथाम तथा नियन्त्रणके लाग ढुरहेरीमे भिडभाड नैकैना तथा स्वास्थ्य मापदण्ड अपनैना आग्रह करल हो ।
सीमासे सर्वसाधरणहुक्रनके आवतजावत ढिउर डेखगैल ओरसे स्वास्थ्य मन्त्रालयसे जारी हुइल विज्ञप्तीहे दृष्टिगत कैटी संक्रमण बह्रे नैडेना स्यानिटाइजर, मास्क ओ सामाजिक दुरी मापदण्ड तथा स्वास्थ्य सुरक्षा सम्बन्धी मापदण्डके पूर्ण पालना कैना सूचनामे आग्रह करल बा ।
