मोहन्याल गाउँपालिका अध्यक्ष नवलसिंहके निधन

पहुरा समाचारदाता
धनगढी,१७ चैत । कैलालीके मोहन्याल गाउँपालिका अध्यक्ष नवलसिंह रावलके मंगरके रोज निधन हुइल बा ।

७७ वर्षके उमेरमे अध्यक्ष रावलके उपचारके क्रममे काठमाडौँके अन्नपूर्ण न्यूरो अस्पतालमे सकारे निधन हुइल परिवारजन जनैले बटै । नम्मा समयसे उच्च रक्तचापसे ग्रसित रावलहे चार दिनआघे केल ‘ब्रेन हेमब्रेज’ हुइल रहे । उहाँहे कोहलपुर मेडिकल कलेजमे उपचारपाछे ठप उपचारके लाग काठमाडौँ लैगिल रहे ।

रावल नेकपा एमालेसे गाउँपालिकाके अध्यक्षमे निर्वाचित हुइल रहिट ।
नेकपा एमालेके कैलाली जिल्लामे संस्थापक नेतामन्से रावल एक रहिट ।

उहे विच वन तथा वातावरणमन्त्री प्रेमबहादुर आले कैलालीके मोहन्याल गाउँपालिकाके अध्यक्ष नवलसिंह रावलके निधनप्रति गहिर दुःख व्यक्त करले बटै । मन्त्री आले मंगरके अस्पतालमे पुगके मृतक अध्यक्ष रावलके आफन्तसंग भेट समेत कैनाके साथे उहाँक शव कैलाली नानेक लाग रु ५० हजार आर्थिक सहयोगसमेत बटै । उहाँक शव आजु कैलाली नन्ना तयारी हुइटी रहल बा ।