नवजीवन सहकारी संस्थाके अत्तरिया शाखा भवन शिलान्यास
पहुरा समाचारदाता
अत्तरिया, १९ चैत । धनगढीमे मुख्य कार्यालय रहल नवजीवन सहकारी संस्थाके अत्तरियामे भवन शिलान्यास करल बा ।
अत्तरियासे २०६४ सालसे सेवा प्रदान करटी आइल संस्थाके अत्तरिया सेवा केन्द्र भवनके शिलान्यास बुधके करल हो । संस्थाके अध्यक्ष चक्र बहादुर सिँह ओ उपाध्यक्ष गोबिन्दराज जोशी संयुक्त रुपमे भवनके शिलान्यास करल हुइट ।
अत्तरियामे भाडाँके भवनसे सेवाग्राहीहे सेवा प्रदान करटी आइल रहे । संस्थाके अध्यक्ष सिंह आपन सेवाकेन्द्र मध्ये प्रधान कार्यालय सहित ३ ठो सेवाकेन्द्र अपने भवनसे सेवा प्रदान करटी आइलमे आब अत्तरिया सेवा केन्द्रसे फेन भवन निर्माणको कार्य सुरु करल जानकारी डेलै ।
भवन निर्माणके लाग धनगढीमे रहल देवसिँह–अञ्जु जेभीसँग इहे चैत ११ गते सम्झौता हुइल हो । १८ महिनाके अवधिमे सम्पन्न कैना मेरके सेवा केन्द्रके ३ तले भवनके भ्याट सहित २ करोड ५३ लाख रकममे ठेक्का सम्झौता करल बा ।
६४ जाने शेयरसदस्य ओ १० लाख ४० हजार शेयरपुँजीसे कारोबार सुरु करल सहकारीमे हाल करिब २० करोड शेयरपुँजी ओ २२ हजारसे ढिउर शेयरसदस्य रहल बाटै । संस्थासे स्थापनाकालसे हालसम प्रधान कार्यालय सहित १० ठो सेवाकेन्द्रसे सेवा प्रवाह करटी रहल बा ।
