लागु औषध विरुद्ध सचेतना
पहुरा समाचारदाता
धनगढी, २० चैत । धनगढीमे बिफेक रोज लागुऔषध सम्बन्धी कार्यक्रम समपन्न हुइल बा । जिल्ला प्रहरी कार्यालय कैलाली ओ नार्कोनन नेपाल बिचके सहकार्यमे लागु औषध विरुद्ध सचेतना कार्यक्रम करल हो ।
भारतसे सिमा जोडल कैलाली जिल्ला रहल कारण फेन यहाँ लागुऔषध ओसारपसार बह्रटी रहल बा । इ ुसंगे युवाहुक्रे यम्ने फस्टी गैल डेखजाइठ् । कैलाली तथा कञ्चनपुरके सिमानाका होके लागुऔषधके कारोवार करुइयाके संख्या फेन बह्रटी रहल बा ।
समाजमे लागुऔषध सेवनके कारण महिला उपर हुइना यौनजन्य क्रियाकलाप, महिला हिंसा, लैङ्गिक हिंसा लगायत घरेलु हिंसा जैसिन टमान खाले घट्ना बह्रटी गैल बावै । लागुऔषध सेवनसे समाजमे टमान खाले घट्ना तथा बिकृति बह्रटी गैल पाइल बा ।
लागुऔषधके सेवनसे प्रत्येक घर परिवारमे महिला पिडित हुइना कहटी लागुऔषधहे नै सामाजिक अपराधके मुख्य रुपमे लेहे पर्र्ना नार्कोनन नेपालके अध्यक्ष पुजा कुवँर बटैली । अइसीन घट्ना न्युनिकरणके लाग ढिउर कार्य हुइलेसे फेन चाहल जैसिन सफलता पाइ नैसेकल प्रहरीके कहाइ बा ।
यहोर जिल्ला प्रहरी कार्यलय कैलालीके प्रहरी नायव उपरिक्षक प्रतिक बिष्ट जिल्लास्तरमे सामाजिक कुरिती फैलैना तथा अपराध बह्रैना कार्य विरुद्ध प्रहरी टमान कार्यक्रम करटी रहल बटैलै । लागुऔषध न्युनिकरण कैना सक्कुजे आआपन भूमिका निर्वाह करे पर्ना धनगढी उपमहानगरपालिकाके उपप्रमुख सुशिला मिश्र भटट् बटैली । यम्ने सर्बप्रथम घर परिवार ओकरपाछे किल औरेक आवश्यकता रहना उहाँके कहाइ रहे ।
युवाहुक्रनहे कुलतमे फसे नैडेहक लाग धनगढी उपमहानगरपालिका फेन टमान कार्यक्रम करटी रहल बटैली । कार्यक्रममे जिल्लाके टमान स्थानीयके जनप्रतिनिधि, शिक्षिका, पत्रकार महिला, विद्याथी छात्रा, महिला प्रहरी, प्रहरी लगायत सरकारी तथा गैरसरकारी संघ संस्थाके महिलाहुक्रनके उपस्थिती रहल रहे ।
