सुर्खेतमे हुइना ५ औं थारु राष्ट्रिय साहित्य सम्मेलनके तयारी पुरा
पहुरा समाचारदाता
धनगढी, २० चैत । सुर्खेतमे हुइना ५ औं थारु राष्ट्रिय साहित्य सम्मेलन २०७७ के तयारी पुरा हुइल बा ।
थारू भाषा, साहित्य, कला संस्कृति प्रवद्र्धनमे सहयोग पुगैना उद्देश्य सहित चैत २१ ओ २२ गते दुई दिन हुइना राष्ट्रियस्तरके साहित्यक सम्मेलनके तयारी पुरा हुइल बा । थारू लेखक संघके आयोजनामे हुइ जैटी रहल सम्मेलनहे थारु पत्रकार संघ नेपाल, जंग्रार साहित्यक बखेरी, थारु कल्याणकारिणी सभा सुर्खेत लगायतके सहयोग रहना जनाइल बा ।
थारू भाषा, साहित्य, कला संस्कृति प्रवद्र्धनमे सहयोग पुगैना उद्देश्यसे सम्मेलन आयोजना हुइ लागल थारु राष्ट्रिय साहित्य सम्मेलनके मूल आयोजक समितिके संयोजक एवं थारु लेखक संघका केन्द्रीय संयोजक डा. कृष्णराज सर्वहारी बटैलै ।
सम्मेलनमे समकालीन साहित्य, कला तथा संस्कृतिबारे बहस, लेखक तथा स्रष्टाहरू ओ सरोकारवालाबीच बृहत अन्तरक्रिया तथा छलफल हुइना उहाँ बटैलै । सम्मेलनमे थारु लोक कला ओ सौन्दर्य बोध, निमाङ थारु लेखनशैली, थारु गीतके डगरा कहोर ?, बाल साहित्य कैसिक लिख्ना लगायत विषयमे सम्मेलनमे छलफल हुइना जनाइल बा । ओस्टके थारु पहिचानके सवाल, सुर्खेतमे थारु पहिचान, थारु भाषाके कविता वाचन, गैरथारु साहित्यकारके नजरमे थारु साहित्य, लोक साहित्यके अवसर सम्भावना लगायत विषयमे बृहत छलफल हुइना जनाइल बा ।
ओस्टके साहित्यिक सम्मेलनमे इ बरसमे प्रकाशन हुइल दर्जनसे ढिउर पुस्तकके विमोचन कैना ओ थारु भाषाके टमान पुस्तक प्रदर्शनी तथा बिक्रीवितरणके लाग स्टल राखजैना जनाइल बा ।
सम्मेलनमे देश भरके करिब दुई सय ढिउर स्रष्टाहुक्रनके सहभागिता रहना जनाइल बा । सम्मेलनमे थारु बाहुल्य रहल तराईंके सक्कु जिल्लाके थारु साहित्यकार, लेखक, पत्रकारके सहभागिता रहना जनाइल बा ।
