निहित स्वार्थके कारण जग्गा व्यवस्थापनमे समस्या
पहुरा समाचारदाता
धनगढी, २१ चैत । मुक्त हलिया ओ कमैयाहुकनके भूमि उप्परके स्वामित्वके सवाल ओ सरोकारवालाहुकनके भूमिका विषयक अन्तरक्रिया कार्यक्रम हुइल बा ।
मुक्त कमैया महिला विकास मञ्च ओ राष्ट्रिय मुक्त हलिया समाजके संयुक्त आयोजनामे शुकके रोज धनगढीमे अन्तरक्रिया कार्यक्रम हुइल हो । कार्यक्रमके उद्घाटन करटी सुदूरपश्चिम प्रदेश सांसद, सामाजिक विकास समिति संयोजक कुन्ती जोशी भूमिहीनहे जग्गाके स्वामित्व डेहेक लाग सब ओरसे एकरुपताके साथ गाले परना बटैले बाटैं । उहाँ भूमिहीन मुद्दाहे सबके साझा सवालके रूपमे लेके जग्गा व्यवस्थापनमे हुइल कमिकमजोरीहे सुधारके काम करेपरना बटैली ।
कार्यक्रममे भूमि सम्बन्धि समस्या समाधान आयोगके केन्द्रीय सदस्य घनप्रकाश जोशी भूमिहीनहे जग्गा व्यवस्थापनमे कुछलोगहुकनके निहिन स्वार्थके कारण समस्या रहल बटैले बाटैं । उहाँ स्थानीय तहसे समन्वय करके काम करलेसे भूमिहीनके समस्या समाधान हुइना विश्वास व्यक्त करलैं ।
अस्टेक कार्यक्रममे सांसद टेकबहादुर रैका जबसम सरोकारवाला मिलके काम नैकरही तबसम मुक्त हलिया ओ मुक्त कमैयाहुकनके जग्गा सम्बन्धी समस्या समाधान नैहुइना बटैलैं । उहाँ मुक्त हलिया ओ मुक्त कमैयाहुकनके हक अधिकारके लाग प्रदेश सरकारहे फेन आग्रह करना बटैलैं ।
कार्यक्रममे गौरीगंगा नगरपालिका–१० के स्थानीय फूलेश्वरी चौधरी ऐलानी पर्टी जग्गाके फाराम भरेबेर स्थानीय तह सहयोग ओ समन्वय नैकरल पाछे अपनेहुक्रे फाराम भर्नासे वञ्चित हुइल बटैली । ‘फारामके भरेक लाग वडा कार्यालय जैबो टे नगरपालिका बठाइठ, नगरपालिका जैबो टे वडा,’ उहाँ कली, ‘आब हम्रे कहाँ जाके फाराम भरी ? हम्रिहिन सब ओहोरसे दुःखे बा ।’
इएलसीए, एलडब्ल्युएफ, एफसीएके सहयोगमे हुइल कार्यक्रमहे हरि श्रीपाइली सहजीकरण करले रहैं । कार्यक्रम मुक्त कमैया महिला विकास मञ्चके अध्यक्ष कौशिला चौधरीके अध्यक्षतामे हुइल रहे ।
