निर्मला पन्तके हत्यारा लग्गे पुगल प्रहरीके दाबी
काठमाडौं, २१ चैत । बलात्कारपाछे हत्या करल कञ्चनपुरके किशोरी निर्माला पन्तके हत्याराके लग्गे पुगल नेपाल प्रहरीके दावी रहल बा । घटनाके लगभग २ बरस ८ महिनापाछे कन्चनपुर प्रहरी अब्बे घटनामे संलग्न दोषी लग्गे पुगल दाबी करल हो ।
सुदूरपश्चिम प्रदेश प्रहरी कार्यालयके प्रहरी वरिष्ठ उपरीक्षक मुकेश सिंहके अनुसार अब्बे घटनाके सुक्ष्म अध्ययन हुइटी रहल बा । कन्चनपुर प्रहरी अब्बे सघन, सुक्ष्म, अध्ययन अनुसन्धान करटी रहल बा । उहाँ कहलै– ‘प्रहरी, हत्याराके एकदम लग्गे पुगसेकल आबके कुछ दिनमे सार्वजानिक करब ।’
जिल्ला प्रहरी कार्यालय कञ्चनपुरसे २०७५ साल कार्तिक १५ गते प्रहरी प्रधान कार्यालयमे फाइबर जाँच कैना सर्टके टुक्राके पठाइल रहे । मने ओकर अब्बेसम जाँच करल नैहो । ओहेमारे घटनाके अनुसन्धानमे फेला परल कहल महत्वपूर्ण ‘क्लु’ के वैधानिकता पुष्टि हुइल नैहो ।
२०७५ साल साउन ११ गते भीमदत्त नगरपालिका–१८, निम्बुखेडास्थित उखुबारीमे निर्मला पन्तके शव बलात्कारपाछे हत्या करल अवस्थामे फेला परल रहे ।
घटनाबारे विस्तृतमे अनुसन्धान कैना काठमाडौंसे गैल प्रहरीके केन्द्रीय अनुसन्धान ब्युरोके टोली भदौ २ गते दिलीपसिंह विष्टहे पक्राउ करल रहे ।
ब्युरोसे गैल प्रहरी वरिष्ठ उपरीक्षक (डीएसपी) अंगुर जीसीसँगके बयानके क्रममे दिलीपसे घटनाके दिन आपन लगाइल सर्ट ओ आकाशे नीला रङके अन्डरवेयरबारे बयान डेहल रहिट । कार्तिक १६ गते अपराध अनुसन्धान विभागसे उक्त नमुनाके जाँचके प्रक्रिया आघे बह्रैना तत्कालीन प्रहरी महानिरीक्षक सर्वेन्द्र खनालके सचिवालयमे पठाइल रहे । चलानी नम्बर २००१ मे दुई खाममे रहल नमुना सचिवालयमे पुगल १२ दिनपाछे २०७५ कार्तिक २८ गते गृह मन्त्रालयसे नेपालमे फाइबर परीक्षणके सुविधा नैरहल ओरसे सुविधा सम्पन्न फरेन्सिक ल्याबमे भारतीय राजदूतावासमार्फत् नमुना परीक्षणके ला पहल कैना निर्णय करल रहे ।
जिल्ला प्रहरी कार्यालय कञ्चनपुरसे फाइबर जाँचके लाग अनुरोध कैके नमुनासहित पत्र पठाइल लगभग ५ महिनापाछे गैल अगहन १२ गते दिल्लीस्थित नेपाली दूतावाससे उक्त फाइबर परीक्षण करे सेकजैना ल्याबके सूचना परराष्ट्र मन्त्रालयहे डेहल रहे ।
२०७७ साल वैशाख ३ गते अपराध अनुसन्धान विभागसे केन्द्रिय प्रहरी विधि विज्ञान प्रयोगशालामे उहे नमुनाबारे पत्राचार करल रहे ।
निर्माला पन्तके घटनामे संलग्न रहल आशंकामे प्रहरी कुछ व्यक्तिहे पक्राउ कैटी बयान लेटी छोरले बा । प्रहरी पन्तके हत्यारा लग्गे पुगल दावी करटी अइलेसे फेन अब्बेसम अन्तिम निष्कर्षमे पुगे नैसेकल बटैले बा ।
