एभरेष्टहे राष्ट्रिय बाल नाटकके उत्कृष्ट उपाधि
पहुरा समाचारदाता
धनगढी, २३ चैत । एभरेष्ट एकेडेमी अत्तरीया बाह्रौं राष्ट्रिय बाल नाटक महोत्सवमे प्रस्तुत करल नाटक भूमिकासे उत्कृष्ट उपाधि प्राप्त करले बा । चैत्र १ गतेसे शुरु हुके चैत २१ गते सम्पन्न हुइल नाटक महोत्सवमे देश भरसे करीब तीन दर्जन नाटक सहभागी हुइल रहे ।
उत्कृष्ट उपाधि प्राप्त करल भुमिका नाटक बलात्कारजन्य अपराध ओ हत्याके घटनामे आधारित हुके मञ्चन करल रहे । यी नाटकके लेखन तथा निर्देशन रंगकर्मी तथा निर्देशक पुष्पराज अवस्थी करल रहिट । निर्देशक अवस्थी एक दशकसे काठमाडौंमे रंगमञ्च, टेलिभिजन तथा चलचित्र क्षेत्रमे सक्रिय रहल बटै । उ नाटकमे सुनिल पन्तके कोरियोग्राफी/सहायक निर्देशन रहे कलेसे एभरेष्ट एकेडेमीके दश जाने विद्यार्थी भाईबहिनीयाहुकनके अभिनय करल रहे ।
यी नाटकमे आशा भट्टराई, आर्या महरा, नेहा सिंह, सुनिता विष्ट, इशा गोर्खाली, प्रिति ठाकुर, युवराज भट्टराई, निरज रावल, दिपक भट्टराई ओ हेमन्त भट्ट आदि कलाकारके रुपमे अभिनय करल रहिट ।
बाल नाटक महोत्सव नेपाल संगीत तथा नाट्य प्रज्ञा प्रतिष्ठान, शैली थिएटर ओ रुसी विज्ञान तथा सांस्कृतिक केन्द्र काठमाडौंसे संयुक्त रुपमे आयोजना करल रहे ।
उ नाटक धनगढी तथा अत्तरीया क्षेत्रमे फेर मञ्चन कैना तयारी हुइटी रहल एभरेष्ट एकेडेमीके प्राचार्य स्माईल चौधरी बटैलै ।
