सरकार ओ संघर्ष समितिबीच दुसरा चरणके वार्ता

पहुरा समाचारदाता
धनगढी, २२ चैत । सरकार ओ थारु कल्याणकारी सभा संघर्ष समितिबीच दुसरा चरणके वार्ता हुइल बा । प्रधानमन्त्रीके परराष्ट्र मामिला सल्लाहकार तथा सरकारी वार्ता टोलीके सदस्य डा. राजन भट्टराई अँटवार संघर्ष समितिसंग दुसरा चरणके वार्ता सम्पन्न हुइल जानकारी डेलै ।

वार्ताके क्रममे संघर्ष समितिसे धरलेसे मागहुकनबारे ठप व्याख्या ओ छलफल हुइल बटैलै ।
वार्ता सहमति उन्मुख रहल ओ दुसरा चरणके वार्ता निकट भविष्यमे फेर बैठना करके अँटवारके बैठक सेकल भट्टराइ बटैलै । यी आघे चैत १७ गते गृहमन्त्री रामबहादुर थापा संयोजक तथा भट्टराई ओ एमाले पूर्वसांसद भगवती चौधरी सम्मिलित सरकारी वार्ता टोली थारू कल्याणकारी सभा, थरुहट–थारूवान संयुक्त संघर्ष समिति ओ केन्द्रीय आन्दोलन परिचालन समितिसंग माग सम्बोधन कैना विषयमे औपचारिक वार्ता करल रहे ।

संघर्ष समिति २०७२ भदौ ७ के टीकापुर हत्याकाण्डमे जेलमे रहल निलम्बित सांसद रेशम चौधरीसहितके व्यक्तिके रिहा, हत्याकाण्डके प्रतिवादी बनाइल सक्कुहुनके मुद्दा फिर्ता, मधेसी क्लस्टरसे निकारके थारूनके अलगे पहिचानसहित आरक्षणके व्यवस्थालगायत १९ बुँदे माग सम्बोधन हुई पर्ना माग आघे सारल बा ।

सरकारी वार्ता टोलीमे प्रधानमन्त्रीके परराष्ट्र मामिला सल्लाहकार डा.राजन भट्टराई ओ पूर्व सांसद भगवती चौधरी सदस्य रहल बटै । थरुहटके ओरसे रुक्मिणी चौधरीके संयोजकत्वमे प्रेमीलाल चौधरी, पदमनारायण चौधरी, चन्द्रबहादुर चौधरी ओ प्रभात चौधरी रहल वार्ता टोली रहल बटै ।