खख्डेहरा फुटाके ओराइल राना थारुके होरी
पहुरा समाचारदाता
धनगढी, २४ चैत । कैलाली, कञ्चनपुरमे बसोबास रहल राना थारु समुदायके होरी पर्व ओराइल बा । सोम्मारके खख्डेहरा फुटाके एक महिना आठ दिनसम मनाजैना होरी पर्वके समापन करल हो ।
माघ पूर्णिमासे इ समुदायके सबसे बरवार पर्व सुरु हुइल रहे । पर्वके अन्तिम दिन खख्डेहरा फुटाके पर्वके समापन करल हो । राना थारु समुदायके खख्डेहराके अवसर पारके सुदूरपश्चिम प्रदेश सरकारसे प्रदेशभर सोम्मारके सार्वजनिक विदा डेहल रहे ।
राना थारु समुदायसे गाउँभर कुछ डुर सडकमे विधिवत रुपमे टायलके टुक्रा फुटैना करठै । जिहीहे खख्डेहरा फुटैना कहिजाइठ् । सक्करही खख्डेहरा फुटैना करजाइठ् ।
गाउँसे डुर जाके खख्डेहरा फुटाइलमे भूतप्रेत भाग्न विश्वास कैना करल दिनदयाल राना बटैलै । गाउँमे रहल भूतप्रेतहे खख्डेहरामार्फत डुसरा इलाकामे पठैना करल उहाँ उल्लेख करलै । ‘आजसे गाउँमे भूतप्रेतके त्रास नैहुइन,’ दिनदयाल कहलै ।
राना थारु जस्टे, कैलालीमे बसोबास रहल कठरिया थारु समुदायमे फेन सोम्मार खख्डेहरासंगे होरी पर्व विधिवत रुपमे सम्पन्न हुइल बा । राना ओ कठरिया डुनु समुदायसे मनैना होरी पर्वमे समानता रहल बा । खख्डेहराके दिन टमान परिकार खैटी नाचगानसहित रमाइलो कैना चलन रहल बा ।
