बेतबाँससे लोभलग्टीक आम्दानी

धनगढी, २७ चैत । कैलालीके धनगढी उपमहानगरपालिका–४, उत्तरबेहडीके थारू महिला बेतबाँसके सामग्री बनाके मजा आम्दानी कैना सफल हुइल बाटै ।

दशकसे घरमे बेतबाँसके सामग्री बनाके उहाँहुक्रे लोभलग्टीक आम्दानी कैना सफल हुइल हुइट । अइसीन सामग्रीसे मजा आम्दानी हुइ लागलपाछे कतिपय अन्यत्र काम करटी रहल आपन परिवारके सदस्यहे फेन घरमे फिर्ता बोलैले बाटै । ‘सक्कु खर्च कटाके इ कामसे वार्षिक १० लाख रुपियाँसम आम्दानी हुइटी रहल बा,’ स्थानीय सरिता चौधरी कहली, ‘सीप सिकके बेतबाँसके टमान सामान बनाइ लागलपाछे जागिरके लाग अन्यत्र जाइ नैपरल हो ।’

चौधरीके गोसिया ट्रक चलैना काम करिन । घरमे बैठके मजा आम्दानी हुइ लागलपाछे गोसिन्याहे ट्रक चलैना काम करे नैडेहल उहाँ बटैठी । ‘ट्रक चलैना जोखिम फेन बा ओ उहाँके ज्याला फेन ढिउर नैरहे,’ उहाँ कहलै, ‘मै आम्दानी करे लागलपाछे उहाँहे जोखिमयुक्त काम करे नैडेनु । अब्बे उहाँ फेन घरमे मोरसंगे बेतबाँसके सामग्री बनैना काम करटी रहल बाटै ।’

चौधरी बेतबाँसके टमान सामग्री बनैटी आइल करिब १३ बरस हुइल बा । एक हजारके बेत किनके सुरुमे काम सुरुवात करल सुनैटी उहाँ अब्बे इहे व्यवसायमे तीन लाख रुपियाँ लगानी करल सुनैली ।

महिलाहुक्रे बेतबाँसके कुर्सी, मुढा, ह्या·र, टोकरी, टेबल, फोटोफ्रेम, सोफा, फूलदानी, पेन होल्डर, ब्रसदानी लगायतके सामग्री बनैटी आइल बाटै । अइसिन सामग्रीके माग सुदूरपश्चिम प्रदेशके सक्कु जिल्लामे हुइल उत्पादन कैना भ्याइनभ्याई रहल चौधरी बटैली ।

विगत एक दशकसे बेतबाँसके सामग्री बनैटी आइल लक्ष्मी चौधरी उत्पादित सामान बिक्रीके लाग बजारके समस्या नैरहल बटैली । ‘उत्पादित सामग्री बिक्रीके लाग हम्रे बजार खोजे कहोरो जाइ नैपरल हो,’ उहाँ कहली, ‘बरु हम्रे उत्पादन करल सामग्री खोज्टी किनुइया मनै अइना करल बाटै ।’

बेतबाँसके सामग्री बनैना काममे लागल लक्ष्मी जिल्लामे सफल उद्यमीके पहिचानसमेत बनैना सफल हुइल बाटी । उहाँ सक्कु खर्च कटाके मासिक ५० हजार रुपियाँसम आम्दानी हुइना बटैली । ‘लगनशील होके काम करलपाछे मजा आम्दानी करे सेकजाइठ्,’ उहाँ कहली । सुरुमे बेतबाँसके सामग्री बनैना काममे अकली लग्लेसे फेन उहाँ अब्बे पटुहिया कल्पनाहे फेन इहे काममे संलग्न करैले बाटी ।

‘भोज कैके आइलपाछे पटुहियाक कौनो सीप नैरहे,’ उहाँ कहलै, ‘मै उहाँहे सीप सिकैनु । अब्बे उहाँ फेन बेतबाँसके टमान सामान बनैना काममे अग्रसर बाटी ।’ सीप सिकके आत्मनिर्भर हुइ पाके कल्पना फेन खुसी हुइल बाटी । उहाँ हाठमे सीप हुइलपाछे जीवनमे ढिउर आनन्द आइल बटैली ।

बेतबाँसके सामान बनाइक लाग महिला टीकापुर नगरपालिकाके सत्ती कर्णालीलगायत टमान सामुदायिक वनसे बेत किनके लन्ना करल बाटै ।