थारू देउथान अवलोकन तथा सहयोग

पहुरा समाचारदाता
धनगढी, २९ चैत । कैलाली जिल्लाके गौरीगंगा नगरपालिका वडा नम्बर १० सुन्दरपुर टोलमे निर्माणाधिन थारू देउथानके अवलोकनके साथे सहयोग करगैल बा ।

गुरुवा बैदवा समाज ओ भल्मन्साके पहलमे बन्टी रहल देउथानके नेपाली कांग्रेसके महासमिति सदस्य लक्ष्मी राज पाठकसे लावा वर्ष पारके १२ हजार सहयोग करल रहिट । ओस्टके उहाँ सुन्दरपुर गाउँके भल्मन्साहे बैसाखी फेन सहयोग करल रहिट ।

२०७५ अगहन १६ गते स्थापना देउथान अब्बे निर्माण हुइटी रहल बा । हाल देउथान के घर, बैठक बैठना घर, ओ ५ कोठाके पक्की घरके लग वडासे ५ लाख सहयोगमे जग निर्माण हुइल बा ।

थारू गुरुवा बैदवा सेवा समाजके नगर अध्यक्ष गोपालदास चौधरीके घरगोसियाइमे हुइल कार्यक्रममे चैत १४ ओ १५ मे हुईल दाङ अबलोकन भ्रमणके समिक्षा फेन हुईल रहे ।