सात दिने खाजा नास्ता बनैना तालिम निम्जल

पहुरा समाचारदाता
हसुलिया, ३० चैत । रोजगारी सृजना कैना उद्देश्यसे कैलारी गाउँपालिकाके सुर्मिनालामे किरण–नेपालसे संचालित सात दिने खाजा नास्ता बनैना तालिम सोम्मारके रोज निम्जल बा ।

चैत २४ गतेसे सुरु हुइल तालिम समापन कार्यक्रमके वडका पहुना कैलारी गाउँपालिका वडा नम्बर ३ के अध्यक्ष कैलाश चौधरी रहिट ।

कार्यक्रममे रेष्ट कैलाली अध्यक्ष रमेश चौधरी, बसन्ता सिएफसिसिके अध्यक्ष रामबहादुर चौधरी, बसन्ता बहुउद्देश्यीय सहकारी संस्था लिमिटेडके व्यवस्थापक दुलीराम चौधरी, सुदूरपश्चिम बहुउद्देश्यीय सहकारी हसुलियाके प्रबन्धक लोकेन्द्र बखरिया, अप्रवासी नेपाली ध्रुुवचन्द्र चौधरी, उत्तर भर्री भीखराम चौधरी लगायत मन्तव्य व्यक्त करल रहिट ।

तालिम समापन कार्यक्रम संस्थाके अध्यक्ष अमृत चन्द्र चौधरीके अध्यक्षतामे हुइल रहे । तालिममे कैलारी गाउँपालिका वडा नम्बर १, ३ ओ ४ वडाके ८ महिला ओ ४ पुरुष करके १२ जाने सहभागी रहिट । कार्यक्रममे सुर्मिनाला रोशन होटलके संचालक रुपा चौधरी प्रशिक्षण डेहल रहिट । कार्यक्रमके संचालन संस्थाके सदस्य दिनेश चौधरी ‘संगम’ करले रहिट । तालिममे सहभागीहुकनहे संस्थागत प्रमाणपत्र डेहल बा ।