सरकार वार्ताके नाउँमे नौटंकी करटा
पहुरा समाचारदाता
धनगढी, १० बैशाख । थरुहट/थारुवान राष्ट्रिय मोर्चाके अध्यक्ष लक्ष्मण थारु सरकार टीकापुर घटना मुद्दाके सवालमे एक महिनासे खाली थारु समुदायसंग वार्ता करली कहिके डेखाइक वार्ताके नौटंकी करल बटैले बटै ।
शुकके रोज कैलालीके एक स्थानमे पत्रकार सम्मेलन करटी उहाँ सरकारसे वार्तामार्फत समस्या समाधान नइहुके वार्ता करल केल डेखाई खोजल आरोप लगैलै ।
‘अभिनसम एक बुँदामेफे छलफल हुइल नइहो,’ उहाँ कहलै, बादलसे आब वार्ता सफल नइहुई, टीकापुर घटनाके सवालमे लाल आयोग ओ देवीराम शर्मा समितिके प्रतिवेदन टेबुलमे धारके प्रधानमन्त्री स्वयम् वार्तामे आई परल ।’
उच्च अदालत दीपायलके टीकापुर घटना मुद्दाके फैसलापाछे दोषी ठहर हुके अर्धभूमिगत रहल थारु छानविन प्रतिवेदन सिरानीटरे नुकाके टीकापुर घटना मुद्दाके समाधान नइहुइना बटैलै । उहाँ कौनोफे समुदायसंगके सद्भाव नइबिग्रना करके मुद्दाके शीघ्र समाधान हुई पर्ना उल्लेख करलै । ‘यिहीहे हाली समाधान करे परल नइटे, पहिल, दुसरा चरणके विरोधके कार्यक्रम करल हम्रे आब १६ गतेसे टिसरा चरणके आन्दोलन करबी, थारु कहलै ।
उहाँ रेशम चौधरी रिहाई ओ टीकापुर घटना मुद्दाहे सरकार गिरैना ओ बनैनासंग जोरे नइहुइना बटैलै । ओस्टेक करके, उ घटनाके उचित समाधानके लाग सरकार रेशम चौधरीहे जेलसे बाहेर निकारके चौधरीसहित बन्दी ओ बन्दीके परिवारसंग वार्ता कैना आवश्यक रहल औंल्यइलै ।
कैलाली जिल्ला अदालत ओ उच्च उदालत दिपायलसे लाल आयोग ओ देवीराम शर्मा समितिके प्रतिवेदन नइहेरके केन्द्रके सेटिङमे मुद्दाके फैसला करके दोषी ठहर्यइल थारु जिकिर करलै ।
उहाँ दुनु अदालतके फैसला चित्त नइबुझल ओरसे कुछ दिन आघे केल काठमाण्डौं पुगके सर्वोच्च अदालतमे अपिल दर्ता कराइल बटैलै । ‘सर्वोच्चसे छानविन आयोग ओ समितिके प्रतिवेदन झिकैनामे हम्रे विश्वस्त बटी, उहाँ कहलै ।
