सरकार ओ थरुहट पक्षबीच ६ बुँदे सहमति, टीकापुर घटनाके मुद्दा फिर्ता हुइना

काठमाडौं, १८ जेठ । सरकारी वार्ता टोली ओ थरुहट÷थरुवान संयुक्त संघर्ष समितिबीच आज मंगलबार हुइल पाँचौ चरणके बार्तासे ६ बुँदे सहमति करले बा । टीकापुर घटनाके आरोपमे लागल सक्कु मुद्दा फिर्ता कैना सहमति हुइल बा ।
सरकारी बार्ता टोलीके सदस्य डा. राजन भट्टराईके अनुसार कैलालीके टीकापुरमे हुइल दुःखद घटनामे आरोपिट धनीराम चौधरी, रेशमलाल चौधरी, लक्ष्मण थारु लगायतके सक्कु मुद्दा फिर्ता कैना सहमति बनल बा । मने ओकर लाग संविधान ओ कानूनसम्मत पहल कैना सहमति करल बा ।
ओस्टेक करके थरुहट आन्दोलनके क्रममे शहीद हुके राहत प्रदान कैना छुटल परिवारहे राहत उपलब्ध करैना, शहीद परिवारके उचित व्यवस्थापन कैना, घाहिलहुकनके उपचार कैना, आन्दोलनके क्रममे हुइल धनजन क्षतिके मूल्यांकन करके क्षतिपूर्ति उपलब्ध करैना ओ महिला, असहायउप्पर हुइल दूव्र्यवहारके छानविन करके कानूनी कारवाही प्रक्रिया आघे बढैना सहमति हुइल बा ।
उहे अनुसार संविधानसे करल व्यवस्थाअनुसार राज्यके हरेक तह ओ निकायमे थारु समुदायके आरक्षणके व्यवस्था तथा संविधानसे डेहल सक्कु व्यवस्थाअनुरुप सहुलियत उपलब्ध करैना, थारु बाहुल्य हुइल क्षेत्रमे प्राथमिक तहसम मातृभाषामे पठन पाठन शुरु कैना, कमैया तथा कमलहरीसंग विगतमे सरकारसे करल सहमतिके कार्यान्वयन कैना ओ औचित्य ओ आवश्यकताके आधारमे सक्कु पक्षसंग छलफल करके संविधान संशोधनके पहल कैना सहमतिफे हुइल डा. भट्टराई बटैर्लै ।

सिंहदरवारस्थित कानून न्याय तथा संसदीय मामिला मन्त्रालयमे हुइल वार्तामे सहमतिके मस्यौदा तयार हुइल थारु कल्याणकारिणीसभा (थाकस) के महामन्त्री तथा वार्ता टोलीके सदस्य प्रेमीलाल चौधरी जानकारी डेलै । सरकार ओ थरुहट वार्ता टोलीबीच काल्ह सोम्मारफे चौठा चरणके वार्ता हुइल रहे ।

यी आघे सरकार गृहमन्त्री रामबहादुर थापा बादलके संयोजकत्वमे वार्ता समिति बनाइल रहे । गृहमन्त्री थापा पदमुक्त हुइलपाछे कानूनमन्त्री लीलानाथ श्रेष्ठहे वार्ताटोलीके संयोजकके जिम्मेवारी डेहल बा ।
थाकसके केन्द्रीय अध्यक्ष धनीराम चौधरीके संयोजकत्वमे रहल थरुहट थरुवान संयुक्त संघर्ष समितिसे यी आघे १९ बुँदे माग धारके धर्ना कार्यक्रम करल रहे । उहे मागहे सम्बोधन कैना सरकार तीन सदस्यीय वार्ता टोली गठन करके वार्ता शुरु करल रहे ।

सरकारी वार्ता टोलीमे प्रधानमन्त्रीके परराष्ट्र मामिला सल्लाहकार डा. राजन भट्टराई ओ एमाले केन्द्रीय सदस्य भगवती चौधरी सदस्य रहल बा । ओस्टेक थरुहट पक्षसे पूर्व सांसद रुक्मिणी चौधरीके संयोजकत्वमे पद्मनारायण चौधरी, प्रेमीलाल चौधरी, प्रभातकुमार चौधरी ओ चन्द्रप्रसाद चौधरी वार्ता समिति सदस्य रहल बटै ।