स्वास्थ्य संकट न्यूनीकरण अगामी बजेटके प्राथमिकताः अर्थमन्त्री शाह
धनगढी, २४ जेठ । सुदूरपश्चिम प्रदेशके आर्थिक मामिला तथा योजनामन्त्री प्रकाशबहादुर शाह अगामी आर्थिक वर्षके बजेट स्वास्थ्य संकट न्यूनीकरणओर केन्द्रित हुइना बटैले बटैं ।
सोम्मार बैठल प्रदेशसभाके बैठकमे अगामी आर्थिक वर्षके बजेट ओ कार्यक्रमके सिद्धान्त तथा प्राथमिकतासहितके पूर्वबजेट दस्तावेज प्रस्तुत करटी मन्त्री शाह कोरोना भाइरस महामारीसे सिर्जित स्वास्थ्य संकट न्यूनीकरण ओ उहिनसे परल प्रभाव नियन्त्रण उन्मुख बजेट नन्ना बटैलैं ।
शाह स्वास्थ्य संकट न्यूनीकरणसँगे कोरोनासे अर्थतन्त्रमे परल नराकात्मक असरसे मुक्त करना मेरिक पुनःउत्थानके कार्यक्रम बजेटके प्राथमिकता रना उल्लेख करले बटैं ।
प्रदेश ओ स्थानीय तहमे स्वास्थ्यके गुणात्मक विकास करटी गुणस्तरीय स्वास्थ्य सेवामे प्रदेशबासीके पहुँच अभिवृद्धि करना, स्वास्थ्य सेवामे प्रदेश सरकारके भूमिकाहे थप सशक्त बनैना, कृषिके उत्पादकत्व वृद्धि करटि खाद्य सुरक्षाके कार्यक्रमहे प्रभावकारी बनैना फेन विशेष प्राथमिकता डेना उहाँ जनैले बटैं ।
अस्टेक मन्त्री शाह गरिबी न्यूनीकरणके साथे दिगो आर्थिक विकासके लाग नतिजामुखी काम करना नीति अवलम्बन करना, रुपान्तरणकारी आयोजनामे स्रोत साधनके कमी हुइ नैडेना बाटहे समेत ध्यानमे ढरके अगामी वर्षके बजेट तथा कार्यक्रम नन्ना बटैलैं ।
आर्थिक मामिला मन्त्री शाहसे प्रस्तुत करल अगामी आर्थिक वर्षके बजेट ओ कार्यक्रमके सिद्धान्त तथा प्राथमिकतासहितके पूर्व बजेट दस्तावेजउप्पर सोमबार बैठ्ना प्रदेशसभाके बैठकमे छलफल सुरु हुइ ।
उपप्रधानमन्त्रीके अभिव्यक्तिके विरोध
प्रदेशसभामे संघीय सरकारके उपप्रधान तथा सहरी विकासमन्त्री राजेन्द्र महतोसे डेहल अभिव्यक्ति राष्ट्र विरोधी कटि विरोध हुइल बा ।
विशेष समय लेके बोलल प्रमुख प्रतिपक्षी दल नेपाली काँग्रेसके प्रदेशसभा सदस्य भरत खड्का उपप्रधानमन्त्री महतोके अभिव्यक्ति देशहे बिखण्डन करना राष्ट्रघाती रहल कटि उहाँउप्पर कारवाहीके माग करलैं ।
अस्टेक खड्का प्रदेश सरकारसे आर्थिक कार्यविधि संशोधन सम्बन्धी नानल अध्यादेशबारे सदनहे जानकारी डेहेपरना माग समेत करले बटैं ।
