यूरो कप–२०२० मे इटालीके विजयी सुरुवात
काठमाडौं, २९ जेठ । यूरो कप २०२० अर्थात यूरोपेली च्याम्पियनसिपके उद्घाटन खेलमे इटाली टर्कीविरुद्ध ३–० के सहज जित निकरले बा ।
घरेलु मैदानमे इटालीके सक्कु गोल दोसर हाफमे सम्भव हुइल हो । दोसर हाफके सुरुवातमे आत्मघाती गोलसंगे इटाली आघे बह्रल रहे ।
खेलके ५३ औं मिनेटमे डोमेनिके बेरार्डीके क्रसहे क्लियर करे नैसेक्के टर्कीके मेरिह डेमिरालहे लाग्के गोल हुइल रहे । ६६ औं मिनेटमे चिरो इम्मोबिले गोल करके इटालीके अग्रता दोब्बर करलैं । ७९ औं मिनेटमे लोरेन्जो इन्सिग्ने गोल करके इटालीहे ३–० से आघे बह्रैलैं ।
इटाली लगातार ९ खेलमे एक फेन गोल नैखाके जीत हासिल करले बा ।
इटाली २८ औं खेलसम फेन अपन अपराजित यात्राहे कायम करले बा । यीबाहेक इटाली यूरो कपके इतिहासमे एक्के खेलमे तीन गोल करल फेन यी पहिल अवसर हो । जीतसँगे इटाली समूह ‘ए’ मे ३ अंक जोरले बा ।
यी समूह अन्तर्गत आज (शनिच्चर) वेल्स ओ स्विटजरल्यान्ड खेलटैं । यी खेल नेपाली समय अनुसार आज साँझ ६ः४५ बजे प्रारम्भ हुइ ।
