किम कलैं– उत्तर कोरिया अमेरिकासँग वार्ता ओ संघर्ष दुनुके लाग तयार रहेपरल

काठमाडौं, ४ असार । उत्तर कोरियाली नेता किम जोङ उन अमेरिकासँग ‘वार्ता ओ संघर्ष’ दुनुके लाग मुलुक तयार रहेपरना बटैले बटैं ।

उत्तर कोरियाली नेता किम बाइडेन प्रशासनप्रति पहिलचो सार्वजनिक रुपमे प्रतिक्रिया डेहल हुइँट् । बिफेक रोज बैठल सत्तारुढ वकर्स पार्टीके केन्द्रीय कमिटीके पूर्ण बैठकमे किम अमेरिकासँग ‘उपयुक्त रणनैतिक तथा सामरिक प्रतिवाद’ के आधारमे व्यवहार करेपरना बटाइल हुँ ।

उत्तर कोरियाली समाचार संस्था केसीएनए नेता किमके कहाइ उद्धृत करटि लिख्ले बा, ‘महासचिव संवाद ओ संघर्षके लाग तयार रहेपरना बाटमे जोर डेले बटैं । विशेष रुपसे हमार मुलुकके गरिमाके रक्षा ओ स्वतन्त्रके विकासके लाग पूर्ण रुपमे मुलुक तयारी अवस्थामे रहेपरनामे उहाँ जोर डेलैं ।’

अइसिन कदमसे उत्तर कोरियामे शान्तिपूर्ण वातावरणके साथे सुरक्षाके प्रत्याभूति हुइना फेन किमके कहाइ रहल रहे । उत्तर कोरियाके लाग भर्खरे नियुक्त हुइल अमेरिकी दूत सुङ किम दक्षिण कोरिया अइनासे २ दिनआघे किम जोङ उहाँक प्रतिक्रिया सार्वजनिक हुइल हो । सुङ किमसे सियोलमे रहल दक्षिण कोरियाली ओ जापानी समकक्षीसँग भेटवार्ता करना कार्यक्रम रहल बा ।

अमेरिकाके म्यासाचुसेट्स इन्स्टिच्युट अफ टेक्नोलोजीके परमाणु मामिलासम्बन्धी विज्ञ विपिन नारंग बाइडेन सत्तामे अइलेसे फेन उत्तर कोरिया ‘पर्ख ओ हेर’ के नीतिहे निरन्तरता डेहल बटैले बटैं । ‘यिहिनसे प्योङयाङसे बल अब्बे अमेरिकी कोर्टमे रहल सोचटा । उ बाइडेन प्रशासन कैसिक आघे बह्रना कना बाटहे पर्खटा,’ रोयटर्ससँग बाटचितमे नारंगसे कले बा, ‘मने पछिल्का समय मुलुकमे डेखाइल कोभिड–१९ ओ खाद्य संकटके कारण किमसे संघर्ष नैचाहल डेखाइठ ।’

पछिल्का समय उत्तर कोरियामे खाद्य संकट देखा परल टमान रिपोर्टमे उल्लेख बा । पछिल्का समय उत्तर कोरियामे महँगी बह्रल बटाइल बा । दक्षिण कोरियाली समाचार संस्था एनकेन्युजके अनुसार अब्बे उत्तर कोरियामे एक किलोके भाउ ४५ अमेरिकी डलर ओ स्याम्पु २ सय डलरसम पुगल बा ।