६ महिनामे १ सय ३९ मानव अधिकार उलंघनके घटना

पहुरा समाचारदाता
धनगढी, ३० असार । अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय धनगढी कैलाली जिल्लामे ६ महिनामे १ सय ३९ ठो मानव अधिकार उलंघनके घटना घटल जनैले बा ।

नेपाल मानव अधिकार वर्ष पुस्तक २०२२ के अर्धवार्षिक पूर्व समिक्षा कार्यक्रममे सन २०२१ जनवरीसे जुनसम हुइल मानव अधिकार उलंघन ओ ज्यादतीके घटना तथ्यांक सार्वजनिक करटी इन्सेक प्रदेश संयोजक खडकराज जोशी जिल्लामे ६ महिनामे १ सय ३९ ठो मानव अधिकार उलंघनके घटना घटल जनाइल रहिट । उ घटना मन्से १ सय ३१ जाने महिला ओ २ जाने पुरुष गैर राज्यसे पीडिट हुइल बटै, कलेसे राज्यपक्षसे ५ जाने पीडित हुइल प्रदेश संयोजक जोशी बटैलै ।

इन्सेकके तथ्यांकमे ६ महिनाके अवधिमे १०१ जाने महिला पीडित हुइल बटै, जेम्ने घरेलु हिंसा ८८, बलात्कार २९, महिला वेचविखन ३, बालिका बेचविखन ३, यौन दुव्र्यवहारसे ८ जाने पीडिट हुइल बटै ।

ओस्टेक यिहे अवधिमे राज्यपक्षके कुटपीटसे १, गैरराज्यपक्षके कुटपिटमे १ करके दुई जाने पुरुष पीडित हुइल बटै । प्रहरीके गोली लागके २ जाने पुरुष घाहिल हुइल बटै, धम्कीसे १ जाने पुरुष, गैरराज्यसे कुटपिटमे परके १ पुरुषके मृत्यू हुइल ओ एक जनहनहे प्रहरीसे गिरफटार करल इन्सेकके तथ्यांकमे अभिलेख हुइल बा ।

नेपाल मानव अधिकार सम्बन्धी अन्तर्राष्ट्रिय अभिसन्धीमे विना शर्त हस्ताक्षर करके मानव अधिकारके संरक्षण, सम्बद्र्ध ओ परिपूर्ति कैना अन्तर्राष्ट्रिय प्रतिवद्धता जाहेर करलेसेफे ओकर कार्यान्वयनमे ध्यान नइडेहल संयोजक जोशी बटैलै ।

‘नेपालके संविधानमे उल्लेखित मौलिक अधिकारके कार्यान्वयनके अवस्थाफे कम्जोर बा, प्रदेश संयोजक जोशी कहलै, ‘अइसिक कागजी रुपमे केल लिखित करल नीतिगत व्यवस्था ओ योजनासे नागरिकके हक अधिकार तथा मानव अधिकारके सम्मान, संरक्षण ओ परिपूर्ति सम्भव नइहो ।’ नागरिकके आर्थिक, सामाजिक तथा सांस्कृति अधिकारहे सुनिश्चित कैना राज्यसे ध्यान डेना आवश्यक रहल उहाँ जनैलै ।

कार्यक्रममे अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय धनगढीके जिल्ला प्रतिनिधि मैनामोती चौधरी जिल्लाभिटर हुइल मानव अधिकारके अवस्था ओ प्रतिनिधिमुलक घटनाबारे जानकारी डेहल रहिट ।

नेपाल मानव अधिकार वर्ष पुस्तक २०२२ के अर्धवार्षिक पूर्व समीक्षा कार्यक्रममे सरकारी वकिल कार्यालयके सहायक न्यायधिवक्त सुरवीर परियार, राष्ट्रिय मानव अधिकार आयोग प्रदेश कार्यालयके अधिकृत प्रकृति सिंह, ओरेक नेपालके जिल्ला कार्यक्रम संयोजक गीता चौधरी, जिल्ला प्रहरी कार्यालय कैलालीके प्रतिनिधि मानव अधिकार वर्ष पुस्तक २०२२ के अर्धवार्षिक पूर्व समिक्षामे अपन बाट राखल रहिट ।