एमाले जोगाइक लाग नेपालहे दोस्रा अध्यक्ष बनैना ओली तयार

काठमाडौं, ७ सावन । नेकपा एमाले अध्यक्ष एवं हाले प्रधानमन्त्रीसे बाहेरहुइल केपी शर्मा ओली उहाँविरुद्ध संघर्षरत पार्टीके वरिष्ठ नेता माधवकुमार नेपाल शेरबहादुर देउवाहे विश्वासके मत डेके पार्टी विपरित काम करलेसे फेन पार्टी बचैना उहाँहे दोस्रा अध्यक्ष डेना तयार करल बटैले बटैं ।
उहाँ महाधिवेशनसम अप्ने अध्यक्ष पद छोरे नैमिल्ना, बरु नेकपामे प्रचण्डसे पाइल हैसियत एमालेमे नेपालहे डेके हुइलेसे एमाले बचैना बटैले बटैं ।

बुधके अपन पक्षीय केन्द्रीय कमिटी बैठकमे सदस्यहुक्रे पार्टी बचैना पहल करना आग्रह करल पृष्ठभूमिमे ओली अप्ने फेन पार्टी बचाइक लाग लागल बटैटि अपनसँग नेपाल मिले अइलेसे पार्टीके दोस्रा अध्यक्ष सुम्पना तयार रहल धारणा ढरले बटैं ।

‘मोरसँग और आग्रह नैहो । मै एकताके लाग मोही आकुर मठाटु । सकभर ओहोर लागल सबहे अपन राजनीतिक जीवन बचैना, आन्दोलन बचैना अनुरोध करटु । एकताके लाग मै माधवजीहे दोस्रा अध्यक्ष सुम्पना फेन तयार बटु । महाधिवेशनसे आघे मै अध्यक्षसे हटे नैमिलि,’ ओलीहे उद्धृत करटि एक केन्द्रीय सदस्य कलैं ।

यीसँगे काल्ह ३ बजेसम एकताके लाग भरपुर प्रयास करना, नेपालहे भेटके दोस्रा अध्यक्षके प्रस्ताव करना, उहाँ उ अस्वीकार करलमे पार्टी बैठकसे उचित निर्णय लेना चेतावनी फेन ओली डेले बटैं ।
उ केन्द्रीय सदस्यके अनुसार सम्भवतः काल्ह ३ बजे आघे ओली ओ नेपालबीच निर्णायक वार्ता हुइ । ओकर लाग कार्यदलके पूर्वसदस्य फेन जुटटैं ।

‘अन्तिम क्षणमे मै संघरियनहे कहटुँ, पार्टी एकतामे आइ । नैटे काल्ह पुस्पलाल स्मृति दिवसके कार्यक्रम ओरैटिकिल ३ बजे फेर बैठक बैठि । उचित निर्णय करि,’ ओलीके कहाई करटि उ सदस्य कलैं ।

मने ओली बुधके शेरबहादुर देउवाहे विश्वासके मत डेहइया नेपालसहित २२ जाने सांसदहुकनहे उबारे स्पष्ट नैपारके अनुशासनहीन, अराजक, अनैतिक ओ अलोकतान्त्रिक तरिकासे प्रयोग करके विपक्षी गठबन्धनमे सामेल हुके अपराधपूर्ण कार्य का कैसिन कारण करलो कना मुख्य प्रश्न करटि २४ घण्टे अल्टिमेटमसहित स्पष्टीकरणपत्र पठैले बटैं ।