थरुहट मोर्चासे बलियामे विरोध प्रदर्शन, भदौ ८ गते करिया दिन मनैना
धनगढी, ७ भदौ । थरुहट थारुवान राष्ट्रिय मोर्चासे कैलालीमे विरोध प्रदर्शन करले बा ।
टीकापुर घटना घटल छैठौं बरसके अवसरमे मोर्चासे कैलालीके बलियामे विरोध प्रदर्शन करल हो । भदौ ७ ओ ८ गतेहे करिया दिनके रुपमे मनैटी आइल मोर्चासे भल्का चौकसे बलिया चौकसम विरोध प्रदर्शन करल हो ।
टीकापुर मुद्दा खारेजी करे पर्र्ना, कैलाली निर्वाचन क्षेत्र नं. १ से निर्वाचित निलम्बित सांसदसहित राजबन्दीहे विना शर्त रिहाइ करे पर्ना, राज्यके हरेक निकायमे पूर्ण समानुपातिक प्रतिनिधित्वके सुनिश्चितता करे पर्ना, कञ्चनपुरसे नवलपरासीसम थरुहट प्रदेश कायम करे पर्र्ना, गिरिशचन्द्र लाल आयोगके प्रतिवेदन सार्वजनिक करे पर्र्ना लगायत माग रख्टी प्रदर्शन करल रहे ।
आयोजित कोण सभामे थरुहट नेता कृष्णा चौधरी, गयाप्रसाद कुश्मी, मोर्चाके जिल्ला संयोजक माधब चौधरी, थरुहट नेता सुशिला चौधरी लगायत मनतव्य व्यक्त करल रहिट ।
संविधान लेखनके क्रममे २०७२ भदौं ७ गते थरुहट आन्दोलनकारी ओ प्रहरीबीच दोहोरो झडप हुइबर १ नाबालक ओ ७ प्रहरीके ज्यान जैना मेरके टीकापुर घटना घटल रहे । ओकर डोसर सकारे भदौ ८ गते कफ्र्यू जारी करल अवस्थामे थारु समुदायके ८० से ढिउर घर, पसल, एफएमलगायत संरचना उपर आगजनी करल रहे ।
मोर्चासे सोम्मार बलियामे शान्तिपूर्ण प्रदर्शन ओ मंगरके रोज भदौ ८ गते ‘करिया दिन’के रुपमे मनैना जनैले बा । मोर्चाके कैलाली संयोजक माधव थारु थारु समुदायके अधिकार ओ रेशम चौधरीके रिहाइके लाग शान्तिपूर्ण आन्दोलनमे रहल बटैलै ।
करिब साढे ३ बरसपाछे टीकापुर घटना सम्बन्धी मुद्दामे कैलाली जिल्ला अदालतसे प्रतिनिधिसभा क्षेत्र नम्वर १ से विजयी सांसद चौधरी सहितके ११ जनहनहे जन्मकैदके फैसला सुनाइल रहे ।
रेशम चौधरी सहित हरीनारायण चौधरी, राजकुमार कठरीया, सुन्दरलाल कठरिया, बृजमोहन डगौरा, राजेश चौधरी, विरबहादुर चौधरी, प्रदीप चौधरी, विद्रोह कना सीताराम चौधरी, श्रवण चौधरी, गंगाराम चौधरीहे जन्म कैदके फैसला करल रहे । श्रवण चौधरी नाबालक रहल ओरसे आधा अर्थात १० बरस सजाय तोकल रहे ।
ओस्टके लक्ष्मण थारु, लाहुराम चौधरीलगायतके १२ जनहनहे ३ वर्ष कैद तोकलमे उहाँहुक्रे कैद भुक्तान कैके छुटल रहिट । मने जिल्ला अदालतके फैसला बदर कैना माग कैटी उच्च अदालत दिपयालमे पुनरावेदन करलपाछे रिहा होसेकल लक्ष्मण थारुहे फेन जन्म कैद हुुइना फैसला सुनाइल रहे ।
६ महिना कैद सजाय तोकल करन चौधरी फेन रिहा हुइल बाटै कलेसे नुरुल अलि जागा कना तहाँवर अलिजागा, बिसराम चौधरी ओ रामनरेश चौधरी सफाइ पाइल रहिट । हालसम फरार रहल ३१ जनहनके मुद्दा अदालतसे मुलतवीमे रख्ले बा ।
