थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २१ असार २६४९, शनिच्चर ]
[ वि.सं २१ असार २०८२, शनिबार ]
[ 05 Jul 2025, Saturday ]

पुनर्स्थापनाके माग कैटी बाढ पीडित

पहुरा | १६ भाद्र २०७८, बुधबार
पुनर्स्थापनाके माग कैटी बाढ पीडित

कञ्चनपुर, १६ भदौ । कञ्चनपुरके दोदा लडियामे आइल बाढके कारण डुबानमे परल पीडितहुक्रनहे खैना बैठ्ना समस्या हुइल गुनासो करले बाटै । गैल भदौ ११ गते आइल बाढसे खाद्यान्न पुहाइल ओ घरमे अब्बेसम हिला जमल कारण बैठे सेक्ना अवस्था नैरहल उहाँहुक्रे बटैले बाटै ।

दोदा लडिया तटीय क्षेत्रमे बसोबास करटी रहल कञ्चनपुरके पुनर्वास नगरपालिका–५ सिमरीमे किल ६० घर डुबानमे परल रहे । ओस्टके पुनर्वासके वार्ड नं २ इँटा भट्टीमे १८ घर डुबानमे परल रहे ।

बाढके कारण आपन घर भटक्के बैठ्ना ढिउर समस्या हुइल खोया राना बटैली । राहतसे फेन सरकारसे आपनहुक्रनहे उचाइ रहल क्षेत्रमे आधा कठ्ठा हुइलेसे फेन घरबासके लाग जमिन उपलब्ध कराइ पर्ना उहाँ बटैली ।

‘सुत्ना कोठासे लेके अँगनासम हिलैहिला बा, घर डुबानमे परल एक अँठ्वार बित सेकल, खोइ अब्बेसम पुनर्स्थापना हुइ सेकल ?,’ उहाँ कहली, ‘इ समस्या ओहकान किल नैहो उहाँ जस्टे करिब ७० परिवारके हो ।’

धानबाली समेत नोक्सान करल कारण आपन ओ परिवारके पेट कैसिक पल्ना कना चिन्तामे रहल औरे बाढ पीडित ठग्नी राना बटैली । ‘खेटुवामे रहल धानबाली फेन बाढ सकाप करल डेहल,’ उहाँ कहली, ‘अब आपन ओ परिवारके पेट कैसिक पल्ना हो ।’ घरभिट्टर राखल अन्नबाली समेत बाढसे पुहाइलपाछे अपनेहुक्रे ढिउर समस्यामे रहल उहाँके कहाइ बा ।

अविरल वर्षासे कञ्चनपुरके बेलौरी नगरपालिका, लालझाडी गाउँपालिका ओ पुनर्वास नगरपालिकाके १८० घर धुरी डुबानमे परल रहे । लालझाडी गाउँपालिकामे किसानसे पालन करटी रहल सुवर ओ मछरी समेत बाढसे पुहाके लैगिल रहे । नेपाल प्रहरीसे रात १२ बजे बाढके सूचना पाइल ओ एलर्ट साइरन बजाइल ओरसे मनै सुरक्षित स्थानमे बैठल ओरसे मानवीय क्षति हुइ नैपाइल इलाका प्रहरी कार्यालयके प्रहरी निरीक्षक कैलाश सिंह विष्ट बटैलै ।

‘हम्रे बाढके सूचना पैटी किल यहाँके तटीय क्षेत्रके बासिन्दाहे फेन खबर करल रही,’ उहाँ कहलै, ‘सूचना पैटी किल उहाँहुक्रे सुरक्षित स्थानमे बैठल ओरसे मानवीय क्षति हुइ नैपाइल । यद्यपि उहाँहुक्रनके अन्नबाली, जनावर भर बाढसे क्षेती करल अवस्था बा ।’

बाढसे घर डुबान होके फसल व्यक्तिनहे सशस्त्र प्रहरी ओ नेपाल प्रहरी, नेपाल रेडक्रस सोसाइटी ओ स्थानीय युवाहुक्रे तत्काल उद्धार करल रहिट । इहीसे आघे फेन २०६५ सालमे आइल बाढसे धनजनके ढिउर क्षति करल रहे । उ बेलाके बाढके कारण बिस्थापति हुइलहुक्रनके १३ बरस बिट्लेसे फेन पुनस्र्थापना भर हुइ सेकल नैहो ।

जनाअवजको टिप्पणीहरू