३३ बरससे वेपत्ता रहल लोकुनहे उद्धार कैके परिवारके जिम्मा लगागैल

पहुरा समाचारदाता
धनगढी, १७ भदौ । कैलालीके लोकुन डगौंरा थारुहे वेपत्ता हुइल ३३ बरस पाछे उद्धार कैके परिवारके जिम्मा लगाइल बा ।

जिल्लाके जानकी गाउँपालिका वडा नम्बर ७ के ६२ वर्षीय लोकेन्द्र नाउँसे चिन्हजैना लोकुनहे कैलाली प्रहरीसे उद्धार कैके बिफेक रोज परिवारके जिम्मा लगाइल हो ।

जिल्ला प्रहरी कार्यालय कैलालीके प्रमुख प्रहरी उपरीक्षक विश्व अधिकारीके अनुसार विगत ३३ बरस आघे कामके सिलसिलामे भारतके सिम्ला गैल उहाँ वेपत्ता हुइल रहिट । गत भदौ ९ गते प्रहरी परिसर टेकु काठमाडौँके प्रमुख प्रहरी वरिष्ठ उपरीक्षक अशोक सिंहसे तालुक गृह मन्त्रालयसे थारु भारतके विहारमे फेला परल सूचना पाछे भारतीय पक्षसे समन्वय कैके उद्धार कैना कैलाली प्रहरीहे जानकारी कराइल रहिट ।

उहे अनुसार कैलाली प्रहरीसे लोकुन डगौरा थारुहे फेला परुइया भारत विहार राज्य गया जिल्ला बाराचट्टी बैठुइया सन्दिप यादव मार्फत जिल्ला प्रशासन कार्यालय पर्सामे हस्तान्तरण करल जनाइल बा । ओकरपाछे लोकुनके छावाहे पर्सामे पठाके कैलाली लानल प्रहरी उपरीक्षक अधिकारी बटैलै ।

उहाँहे लोकुनके छावा राम बहादुर डगौरा थारुके जिम्मा लगाके पारिवारिक पुनर्मिलन कराइल जनाइल बा । अब्बे लोकुन डगौरा सक्कु चीज स्मरण करे ओ अभिव्यक्ति करे सेक्ना अवस्थामे नैरहल बुझल बा ।