द्वन्द्वकालमे भस्काइल भवन अभिन नैबनल

कृषि विकास बैंकके अधिकांस शाखा भाडामे बैठना बाध्य

पहुरा समाचारदाता
धनगढी, २१ भदौ । सशस्त्र द्वन्द्वकालमे भस्कागिल कृषि विकास बैंकके भवन अभिनसम पुनर्निर्माण हुइ नइसेकलपाछे अपने जग्गा रहल यी बैंकके टमान शाखा भाडामे बैठना बाध्य रहल बटै ।

जनयुद्धकालमे तत्कालिन नेकपा माओवादीसे सुदूरपश्चिम प्रदेशके हसुलिया, डडेल्धुरा, महेन्द्रनगर, टीकापुर ओ बेलौरीेमे रहल कृषि विकास बैंकके भवनहे क्षतिग्रस्त बनैले रहे । २०६३ साल अगहनमे बिस्तृत शान्ति सम्झौतापाछे नेकपा माओवादी अब्बे सरकारमे बा, मने अटरा नम्मा समयसम क्षतिग्रस्त भवनके पुनर्निर्माण हुई सेकलपाछे उ बैंकके टमान शाखा भाडा बैठना बाध्य रहल कृषि विकास बैंकके सुदूरपश्चिम प्रदेश निर्देशक योगेन्द्रबहादुर सिंह बटैलै ।

सुदूरपश्चिम प्रदेशमे कृषि विकास बैंकके प्रदेश कार्यालय सहिट २७ ठो शाखा बा, उ मन्से पाँच ठो भवनहे तत्कालिन नेकपा माओवादी भस्कैले रहे । क्षतिगस्त हुइल भवन मन्से टीकापुरमे गैल बरससे निर्माण कार्य सुरु करल बा, कलेसे बेलौरीमे रहल भवनहे पुनर्निर्माण ओ उहे संरचनामे ठोरिक परिवर्तन करजैटी रहल कृषि विकास बैंकके प्रदेश निर्देशक सिंह बटैलै ।

उहाँ कहलै, हसुलिया शाखा भवनके हकमे गत बरस ओभरसियर योजनाफे आके नापजोख करके लैगिल रहे, सुरुमे रहल विधिमार्फत भत्कल भवनहे कुछ करके आघे लैजाई सेक्जाई की कना रहे, मने ढेर नोक्सान हुसेकल ओरसे उ ठाउँमे नयाँ संरचना बनाई पर्ना अवस्था विल्गाइल ।

गैल बरस कैलालीके टीकापुर ओ कञ्चनपुरके बेलौरीमे योजना परके काम सुरवाट हुइल बा प्रदेश निर्देशक सिंह कहलै, यी बरस बजेटके पलान प्रस्ताव जासेकल बा, बजेट कार्यान्वयन हुइटे यिहे आर्थिक बरससे हसुलिया, महेन्द्रनगर ओ डडेल्धुरामे भवन निर्माण कार्य सुरु हुई ।

सुदूरपश्चिम प्रदेशमे कृषि विकास बैंकके २७ शाखा मन्से अपने भवन धनगढी उपमहानगरपालिका वडा नम्बर १ स्थित पुरान फुलवारी बसपार्क बसन्त टोलमे रहल प्रदेश कार्यालय, रातो पुलमे रहल धनगढी शाखा, कैलालीके भजनी नगरपालिकामे रहल भजनी शाखा, पहाडमे दार्चुला, बैतडीके पाटन रहल बा । कलेसे २१ ठो शाखा अभिन भाडामे बैठना बाध्य बटै ।

सशस्त्र द्वन्द्वकालमे कृषि विकास बैंकके करिब सक्कु शाखा विस्थापित हुके सदुरमुकाम केन्द्रीत हुइल रहिट । करिब डेढ दशकपाछे अपने ठाउँके स्थापित हुइल मने अपने जग्गामे रहल भवन क्षतिग्रस्त अस्थामे रहलपाछे उ शाखा भाडामे बैठना बाध्य रहे ।

उ मन्से कृषि विकास बैंक हसुलिया शाखा भवन अभिन क्षतिग्रस्त अवस्थामे बा, भवन पुनर्निर्माण हुइ नइसेकलपाछे भस्कल भवन छेगरीपल्ना गोठ बनल बा, मने जग्गा अतिक्रमणसे जोगैना संरक्षणके लाग बैंकसे बाउण्डरी भर करले बा ।

सशस्त्र द्वन्द्वकालमे विस्थापित हुइल बैैंक २०७२ सालमे फेरसे हसुलियामे स्थापित हुइल, मने अपन भवन क्षतिग्रस्त अवस्थामे रहलपाछे अब्बे भाडामे बैठके सेवा डेटी रहल शाखा प्रमुख रोशन केसी बटैलै । बैंक रहल घरहे मासिक ३० हजार रुप्या भाडा टिरटी रहल उहाँ जनैलै ।

अब्बे कृषि विकास बंैकके शाखासे ढेर सेवा डेटी रहल बटी, शाखा प्रमुख केसी कहलै, मने अपने सेवासुविधा भवन रहलेसे ठप सेवा सुविधा बढाई सेक्जाइट । सकिर ठाउँ हुइल ओरसे सेवाग्राहीहुकन सेवा लेना ठोरिक समस्या रहल उहाँ बटैलै । चेक सटना, पैसा जमा कैना काउण्टर रहल जग्गा बहुट साँकिर, कोरोनाके महामारी चल्टी रहल बेला दुरी कायम कैना ढेर समस्या रहल उहाँ कहलै ।

उहाँ कहलै, बैंकके अपन चार कटठा जग्गा बाटिस, भवन बनाइक लाग ५० लाख रुप्या बजेट माग करले बटी, केन्द्रसेफे बजेट विनियोजन कैना आवश्वासन डेले बा, कार्यान्वयन हुइटीकी यिहे आर्थिक बरससे काम सुरु हुई । कैलारी गाउँपालिकाके मुख्य बजार हसुलिया बजार ऐलानीप्रति रहल ओरसेफे स्थायी भवन भवन बनैना ठोरिक ढिला चासो हुइल शाखा प्रमुख बटैलै ।