तीन दिनसम शव नै उठल, विद्यार्थीनसे प्रर्दशन
पहुरा समाचारदाता
धनगढी, १२ कुवाँर । सुत्केरीके मृत्युके तीन दिनसम फेन आफन्तहुक्रे अस्पतालसे शव नैउठैले हुइट । मृतकके आफन्त अस्पतालके लापरबाहीके कारण अनहकमे ज्यान गुमाइ परल कहटी शव उठैना नैमानल हुइट ।
शनिच्चरके सुत्केरी ब्यथा लागलपाछे धनगढीके नवजीवन अस्पताल पुगल डोटीके शिखर नगरपालिका ६ के २६ वर्षीया कल्पना सिंह मल्लके अँट्वारके सकारे मृत्यु हुइल रहे ।
महिनौँआघेसे चेकजाँच कैटी आइल डाक्टरहुक्रे बिरामीके अवस्था थाहा नैपैना लापरबाहीके पारकाष्ठा रहल मृतकके आफन्त बटैटी आइल बाटै । बिरामी स्वयं अप्रेसनके लाग अनुरोध करलेसे फेन चिकित्सक भ्याकुम प्रयोग करेबर मृत्यु हुइल दावी आफन्त करले बाटै ।
आफन्तहुक्रे घटनाके छानबिन ओ दोषीहे कारबाहीके माग रख्टी माग सम्बोधन नैहुइटसम मृतकके शव नैउठैना अडान लेले बाटै । सोम्मारके दिनभर जिल्ला प्रशासन कार्यलय कैलालीमे बैठलेसे फेन सहमति हुइ नैसेकलपाछे मंगरके पुनः जिल्ला प्रशासनमे सहमतिके प्रयास हुइटी रहल बा ।
यहोर नवजीवन अस्पतालके स्त्रीरोग विशेषज्ञ डाक्टर जयराज केसी सुत्केरी मल्लके उच्च रक्तस्रावके कारण मृत्यु हुइल बटैले बाटै । अस्पतालके विशेषज्ञ चिकित्स हरप्रयास कैलेसे फेन सुत्केरी महिलाहे बचाइ नैसेकल अस्पताल प्रशासन जनैले बा ।
सुत्केरी मल्लके पाठेघरके मुह नरम किल होके एक घर खुलल ओ औषधिसे औरे घर खुलाइल अस्पतालसे जारी करल बिज्ञप्तिमे उल्लेख करल बा । ओकरपाछे बच्चाके धड्कन कम हुइटी गैल ओ डाइकमे बच्चा जन्मैना बल नैपुगलपाछे भ्याकुम प्रयोग कैके शनिच्चरके रात ११ बजेर ४४ मिनेटमे डेलिभरी कराइल जनाइल बा ।
उ क्रममे पाठेघरके मुह चाकर बनाइक लाग इपिसियोटोमी एक्सटेन्डेड टियर डेहल अस्पताल जनैले बा । इपिसियोटोमी एक्सटेन्डेड टियरहे सिलैना प्रयास करलेसे फेन उहाँ असहज महसुस करलपाछे एनेस्थेसियाहे बोलाके टाँका सिलैना काम करल, मने अत्यधिक रक्तस्रावके कारण बिरामीहे कार्डियाक एरेस्ट होके मृत्यु हुइल दाबी अस्पतालके रहल बा । चिकित्सकहुक्रे कौनो लापरबाही नैकरल कहटी अस्पतालसे अँट्वारके स्पष्टीकरण डेसेकल बा ।
यहोर मृतक मल्लके न्यायके माग कैटी विद्यार्थीहुक्रे प्रर्दशन करले बाटै । सुदूरपश्चिमाञ्चल एकेडेमी (एसपीए)के विद्यार्थीहुक्रे मुख्यमन्त्री कार्यालयआघे प्रर्दशन करल हुइट ।
उहाँहुक्रे अस्पताल तथा डाक्टरहुक्रनके लापरबाहीसे मल्लके ज्यान गैल कहटी नाराबाजी कैटी प्रदर्शन करल हुइट ।‘कल्पनाहे न्याय दे’, ‘अस्पताल प्रशासन मुर्दावाद’, ‘मेडिकल माफिया मुर्दावाद’ जैसिन नारा लगाके उहाँहुक्रे कुछ घचिक सडक समेत अबरुद्ध पारल रहिट ।
