जनगणनामे अपाङ्गता रहल नागरिकहुकनके सही तथ्याङ्क आवश्यक

पहुरा समाचारदाता
धनगढी, १५ कुँवार । राष्ट्रिय जनगणना अभियानमे अपांगतालगायत पाछेपारल समुदायके बलगर तथ्यांक अइलेसे देशके विकास योजना बनेबेर उहाँहुकनके अधिकारके आवाज उठैना सहयोग पुग्ना एक कार्यक्रमके सहभागीहुक्रे बटैले बटैं ।

सर्वाड्डीण अपाड्डता विकास समाजके आयोजनामे शुकके रोज धनगढीमे हुइल राष्ट्रिय जनगणना २०७८ मे सक्कु मेरिक अपांगता रहल नागरिकहुकनके गणना, सहभागिता ओ कानूनी प्रावधानसम्बन्धी कार्यशाला गोष्ठी कार्यक्रमके सहभागीहुक्रे जनगणनामे अपांगता रहल नागरिकहुकनके गणना, सहभागिता गणकहुकनके क्षमता विकास कैके अपांगता नागरिकहुकनके वास्तविक तथ्यांक संकलन करलेसे देशके योजनामे महत्वपूर्ण भूमिका रना बटैलैं ।

कार्यक्रममे कैलालीके सहायक प्रमुख जिल्ला अधिकारी हिरालाल चौधरी जनगणनामे कैनो द्विविधा नैहुइना मेरिक तथ्यांक संकलन करे लाग गणकहुकनहे सक्षम बनाइ परना बटैलैं । उहाँ कलैं, ‘अपांगता रहल नागरिकके गणना करेबेर कार्यक्षेत्रमे खटल गणकहुक्रे जिम्मेवारी पूर्वक तथ्यांक संकलन करलेसे सहि गणना हुइ ।’ यकर लाग सरोकारवाला निकायसे सहयोग ओ समन्वय करे परना आवश्यक रहल उहाँ बटैलैं । अस्टेक, जिल्ला प्रशासन कार्यालय अपांगताहुकनके समस्याहे पहिल प्राथमिकतामे ढरके काम करना ओ अगामी दिनमे फेन प्राथमकिताके साथ काम करना प्रतिवद्धता व्यक्त करलैं ।

कार्यक्रममे प्रदेश निर्वाचन कार्यालयके प्रमुख प्रेमराज भट्ट अपने घरपरिवारसे अपांगताहुकनके बारेमे नैखुलाइल ओरसे फेन अपांगताहुकनके वास्तविक तथ्यांक नैआइल बटैलैं । उहाँ कलैं, ‘जनचेतना नैरना, सरोकारवाला निकाय ध्यान नैडेके अपांगता हुइलहुकनके तथ्यांक लुकाजाइठ ।’ ‘जनगणनामे अपांगता हुइलहुकनके तथ्यांक नैआइटसम आवाज उठे नैसेकि,’ उहाँक अनुसार सुदूरपश्चिममे १५ हजारसम अपांगताहुकनके संख्या रहलमे निर्वाचन भोटर नाम सूचीमे २ हजार १ सय ९८ जाने अपांगता हुइल नागरिकके किल नाम बा ।

अस्टेक कार्यक्रममे सुदूरपश्चिम प्रदेश जनगणना कार्यालय धनगढीके जनगणना अधिकृत सुरेन्द्र रावल प्रत्यक्ष डेखैना वा इन्द्रिय सम्बन्धी विचलन हुके प्रत्यक्ष नैडेखैना अपांगता हुइ सेक्ना हुइल ओरसे अपांगतासम्बन्धी विवरण संकलन करेबेर ध्यान डेहेक परना बटैलैं । ‘घरपरिवार विभेद हुइना डरसे फेन वास्तविक तथ्यांक नैडेहठ,’ उहाँ कलैं, ‘खास कैके महिलाहुकनके विवाहलगायतमे समस्या हुइना ओरसे अपांगता हुइलेसे फेन जानकारी नैकरैठैं ।’ उहाँक अनुसार जनगणनाके मुख्यगत खण्डके महल ३० मे अपांगतासम्बन्धी विवरण उल्लेख करल बा ।

सामाजिक विकास मन्त्रालयके उपसचिव गणेशबहादुर सिंह जनगणनाके गणकहुकनहे प्रशिक्षण डेहुइया प्रमुख प्रशिक्षकहुकनहे फेन अपांगता हुइल नागरिक विषयमे तालिम डेहे परना बटैलैं । अस्टेक अपांगता हुइल नागरिकहुकनहे वर्गीकरण कैके तथ्यांक लेना आवश्यक रहल उहाँ बटैलैं । लुथरन वल्र्ड फेडरेशन नेपालके प्रमुख बालकृष्ण चौधरी अपांगता नागरिकहुकनके वास्तविक तथ्यांक संकलन करेक लाग अपांगता हुइल नागरिकके क्षेत्रमे काम करुइया संघसस्थासे सहजकर्तामार्फत समन्वय करेपरना बटैलैं । अपांगता अधिकारकर्मी नन्दराज भट्ट जनगणना लेहे गिल गणकहुकनहे अपांगता हुइल नागरिकहे सम्मानपूर्वक ओ सभ्य भाषाके बारेमे फेन तालिम डेहे परना बटैलैं ।

कार्यक्रममे लुथरन वल्र्ड फेडरेशन नेपालक सुदूरपश्चिम व्यवस्थापक मानध्वज खत्री, दिगो विकास समाज कैलालीके अध्यक्ष रामबहादुर सुनार, धनगढी उपमहानगरपालिकाके महिला शाखा प्रमुख अनिता बुढा ऐर, सामुदायिक विकास अधिकृत टंक बिष्ट, दिगो विकास समाजके कार्यकारी निर्देशक लक्ष्मीदत्त भट्ट, रिहाव फाउन्डेशनके जिल्ला कार्यक्रम प्रमुख, ईन्द्रबहादुर पाली, कौशिला चौधरीलगायत मन्तव्य व्यक्त करले रहैं ।

उ कार्यक्रममे सरकारी, गैरसरकारी, युएनडिपि, एलब्ल्युएफलगायत सरोकारवालाहुकनके सहयोगमे ‘काउन्ट मि इन्क्युड अस’ अभियानमे पर्चा पम्प्लेट लगायत जनचेतनामूलक कार्यक्रममे सहजीकरण करना प्रतिबद्धता व्यक्त हुइल बा ।

दिगो विकास भजनी, एलडब्ल्युएफके सहयोगमे हुइल कार्यक्रम सर्वाड्डीण अपाड्डता विकास समाजके अध्यक्ष कृष्णप्रसाद भण्डारीके अध्यक्षतामे हुइल रहे ।