खाद्य सुरक्षा कोष स्थापना कैना निर्णयहे कार्यपालिकासे अनुमोदन
हिउँदे बालीके बीउबिजन सतप्रतिशत अनुदान, मालपोत शुल्कमे २५ प्रतिशत छुट
पहुरा समाचारदाता
हसुलिया, ७ कार्तिक । कैलालीके कैलारी गाउँपालिकाके कार्यपालिकासे बाढ प्रभावितहे राहत सम्बन्धमे सर्वदलीय बैठकसे करल निर्णयहे अनुमोदन करले बा ।
अँट्वारके बैठल कार्यपालिकाके बैठकसे कुछ थपसहित सर्वदलीय बैठकस करल निर्णयहे अनुमोदन करल हो । उ गाउँपालिकाके कार्यालयमे गैल बुधके बैठल सर्वदलीय, सर्वपक्षीय बैठकसे कैलारी गाउँपालिकाभिट्टर भोकमरी न्यूनीकरणके लाग तीन करोड २५ लाख रुपैयाँ बराबरके खाद्य सुरक्षा कोष स्थापना कैना निर्णय करल रहे ।
कोषमे राहत तथा सहयोगके लाग संघीय, प्रदेश सरकार तथा अन्य सहयोगी संघ, संस्थाहे अनुरोध कैना सर्वदलीय बैठकसे निर्णय हुइल रहे । ओस्टके, बैठकसे पीडित किसानहे राहत उपलब्ध कराइक लाग संघीय ओ प्रदेश सरकारहे अनुरोध कैना फेन निर्णय करल रहे । साथे, प्रदेश पूर्वाधार विकास कार्यक्रमके रकमसे समेत खाद्य सुरक्षा कोषमे रकम जम्मा कैना प्रदेश सभा सदस्यहे अनुरोध कैना, गाउँपालिकाके जनप्रतिनिधि, कर्मचारीके एक दिनके तलब कोषमे जम्मा कैना, चालु आर्थिक बरसके विकास बजेटसे रकम रकमान्तर कैना ओ कोषमे जम्मा कैना निर्णय सर्वदलीय बैठकसे करल रहे ।
गाउँपालिकाके कार्यालयसे ज्येष्ठ नागरिक, एकल महिला, यौनिक तथा अल्पसङ्ख्यक, अपाङ्गता रहल व्यक्तिहुक्रनके सिफारिस करेबर लग्ना सेवा शुल्क मिनाहा कैना, धानबाली नोक्सान हुइल किसानहे हिउँदे बालीके बीउबिजन सतप्रतिशत अनुदानमे उपलब्ध करैना बैठकसे निर्णय करल रहे । धान बालीसहित अन्य बाली गुमाइल किसान कृषिमे करल लगानीसमेत असुल करे नैसेक्ना अवस्था रहल ओरसे टमान बैंक तथा वित्तीय संस्थासे लेहल कृषि ऋण मिनाहाके लाग नेपाल सरकार ओ सम्बन्धित निकायहे अनुरोध कैना सर्वदलीय बैठकसे निर्णय करल रहे ।
गाउँ कार्यपालिकाके बैठकसे सर्वदलीय बैठकके निर्णयहे अनुमोदन कैटी इ बरस कृषकहे मालपोत शुल्कमे २५ प्रतिशत छुट डेना निर्णय फेन करल प्रवक्ता कमलप्रसाद चौधरी जानकारी डेलै ।
गाउँपालिकाभर बाढसे करल नोक्सानके यकिन तथ्यांक संकलन, प्राथमिकीकरण लगायत अन्य विपद् व्यवस्थापनके लाग गाउँपालिकाके आर्थिक समिति संयोजक कैलाशप्रसाद चौधरीके संयोजकत्वमे कार्यदल गठन करल बा । कार्यदलमार्फत तथ्यांक संकलन लगायतके कार्य हुइटी रहल जनाइल बा । ओस्टके, भिजके बिग्रल धान खरिदके सम्बन्धमे फेन कार्यदलसे निर्णय लेना प्रवक्ता चौधरी बटैलै ।
