दुसरा चोखाल स्मृति कप हुइना

पहुरा समाचारदाता
धनगढी, ११ कार्तिक । पुर्वमन्त्री स्वर्गीय टेकबहादुर चोखालके सम्झनामे दुसरा टेकबहादुर चोखाल स्मृति कप हुइना बा ।

निसर्ग अस्पतालके मुख्य प्रायोजनमे फुटसल प्रतियोगिता धनगढीमे हुई लागल हो । टेकवहादुर चोखाल फाउण्डेसनके आयोजना ओ अभि मिडिया ईभेन्ट्स एण्ड स्पोर्टसके व्यवस्थापनमे कार्तिक १३ गतेसे १५ गतेसम धनगढी उपमहानगरपालिका ओ गोदावरी नगरपालिका वडाके टीम सहभागी हुइना फुटसल प्रतियोगिता हुइना टेकवहादुर चोखाल फाउण्डेसनके अध्यक्ष विनय चोखाल जानकारी डेलै ।

धनगढी उपमहानगरपालिकाके ओ गोदावरी नगरपालिकाके टमान वडा टिम बनाके खेलमे सहभागिता हुइना ओ टीमके खेलाडी सम्बन्धित वडाके हुई पर्ना, एक वडासे एकसे ढेर टीमफे सहभागी हुई सेक्ना अध्यक्ष चोखाल बटैलै । उहाँ युवाहुक्रनहे फुटसलओर आकर्षण वढाइक लाग टमान खेलकुद हुँदा हुइटीफे चोखाल स्मृति कप फुटसल प्रतियोगिता आयोजना करल जानकारी डेलै ।

‘पहिल संस्करणमे धनगढी उपमहानगरपालिकाके वडाके टीम केल सहभागी कराके प्रतियोगिता करल हुई । दुसरा संस्करणमे छिमेकी गोदावरी नगरपालिकाके वडाके टीमफे थप करल हुई ।’ फाउण्डेसनके अध्यक्ष चोखाल कहलै–‘अइना दिनमे प्रतियोगिताहे विस्तारे और क्षेत्रमेफे फैलैटी लैजैबी ।

पुरस्कार राशीफे हरेक संस्करणमे बृद्धि करटी लैजैबी । प्रतियोगिताके मुख्य प्रायोजक निसर्ग अस्पतालके अध्यक्ष तिर्थ पन्त फुटसलके माध्यमसे स्वास्थ्यमे सुधार हुइना बटैलै । उहाँ यी क्षेत्रके खेलकुद विकासके लाग अस्पताल सदा तयार रहल बटैलै । पहिल संस्करणहेफे निसर्ग अस्पताल मुख्य प्रायोजनके रुपमे सहयोग करल हुई ।

दुसरा निसर्ग अस्पताल टेकबहादुर चोखाल स्मृति कपके विजेतासे नगद ५० हजार सहित ट्रफी मेडल पुरस्कार प्राप्त करी कलेसे उपविजेता नगद नगद २५ हजार सहित ट्रफी मेडल पुरस्कार प्राप्त करी । ओस्टेक प्रतियोगिताके उत्कृष्ट खेलाडी, उत्कृष्ट गोलरक्षक ओ सर्वाधिक गोलकर्तासेफे नगद सहित ट्रफी मेडल पुरस्कार प्राप्त करही ।

पहिल संस्करणके विजेता नगद ३० हजार सहित ट्रफी मेडल तथा उपविजेतासे १५ हजार नगद सहित ट्रफी मेडल पुरस्कार प्राप्त करले रहिट । प्रतियोगिता धनगढीके फ्ल्याटल्याण्ड फुटसलमे आयोजना हुइना टेकवहादुर चोखाल फाउण्डेसन जनैले बा ।

के हुइट टेकवहादुर चोखाल ?

टेकवहादुर चोख्याल नेपाली राजनितिज्ञ ओ नेपाली काग्रेंसके प्रभावशाली नेताके रुपमे परिचित बटै । नेपाली काग्रेंससे २०५६ सालमे चोख्याल साविकके कैलालीके निर्वाचन क्षेत्र नम्बर ४ से विजयी हुइल रहिट । ओकर ३ बर्षपाछे शेरवहादुर देउवा प्रधानमन्त्री हुइल वेला चोख्याल कानुन मन्त्री समेत बनल रहिट ।

०६४ सालके पहिल संविधान सभाके निर्वाचनमे साविकके कैलाली निर्वाचन क्षेत्र नम्बर ६ से नेपाली काग्रेंसके ओरसे संविधान सभा सदस्यके उम्मेदवारफे रहिट । नेपाली काग्रेंसके नेता तथा पुर्व मन्त्री टेकवहादुर चोख्यालके २०६६ कार्तिक २७ गते काठमाण्डौंमा निधन हुइल रहे ।