मानसिक स्वास्थ्य समस्यासम्बन्धी स्थानीयपालिकासे छलफल

पहुरा समाचारदाता
धनगढी, ३० फागुन । मनोसामाजिक तथा मानसिक स्वास्थ्य सम्बन्धी स्थानीयस्तरमे छलफल कार्यक्रम हुइल बा ।

कोसिस नेपाल, मितिनी नेपाल ओ यूथ थिङर सोसाइटीके संयुक्त आयोजनामे सोम्मारके रोज धनगढीमे कैलालीके कैलारी गाउँपालिका, गौरीगंगा नगरपालिका ओ कञ्चनपुरके कृष्णपुर नगरपालिका, पुनर्वास नगरपालिकाके प्रतिनिधिहुकनसे छलफल करल हो ।

कोभिड–१९ से प्रभावित महिला यूवा तथा पछारल समुहके लाग मानसिक तथा मनोसामाजिक स्वास्थ्य सहयोग परियोजना अन्तर्गत पालिकाहुकनसे छलफल करल कोसिस नेपाल सुदूरपश्चिम प्रदेशके मनोसामाजिक विमर्शकर्ता पशुपति खाती बटैली ।

छलफल कार्यक्रममे कैलारी गाउँपालिकाके स्वास्थ्य शाखा प्रमुख विरेन्द्र सापकोटा कोभिडके बेला मनोसामाजिक प्रवद्र्धके लाग क्वारेन्टाइन, आइसोलेसन सेवा, कारोना अस्थायी अस्पताल, प्रेषण, परामर्श सेवा डेहल बटैलै ।

कोभिडके यी अवधिमे स्वास्थ्यचौकीसे डिप्रेसन, मृगी, साइकोसिस, ओ एपिलिप्सी रोग सम्बन्धी औषधी निःशुल्क उपलब्ध करैटी आइल ओ २÷२ जाने परामर्शदाता ओ ट्रेनरहुकनकेफे वेवस्था रहल उहाँ बटैलै । स्थानीयस्तरसे बजेट विनियोजन करके मानसिक स्वास्थ्य सम्बन्धी आवश्यक औषधी खरिद, स्वास्थ्य समस्या सम्बन्धी टमान कार्यक्रम करल प्रमुख सापकोटा बटैलै । मानसिक स्वास्थ्य रहल व्यक्तिहुकनके वडाके सिफारिससे निःशुल्क स्वास्थ्य विमा करलफे स्वास्थ्य शाखा प्रमुख जनैलै ।

गौरीगंगा नगरपालिकाके उप प्रमुख अञ्लचा चौधरी कोभिड महामारीके बेला ६ महिनाके लाग अलग मनोसामाजिक विमर्शकर्ताके नियुक्त करके मनोसामाजिक परामर्श सेवा प्रदान करल बटैली । नगरपालिका अन्र्तगत २७ ठो विद्यालयमे ५४ जाने मनोसामाजिक विमर्श फोकल शिक्षक व्यवस्था करके परामर्श डेहल बटैली ।

यी अवधिमे कोभिड अस्पतालके स्थापना ओ व्यवस्था, क्वारेन्टाइनमे जाके मनोसामाजिक परामर्श सेवा, विमर्शकर्ता सहिटके सेप हाउस, मनोसामाजिक समस्या रहल व्यक्तिहुकनहे कोसिस संस्थामे उपचारके काठमाण्डौ पठाइल उहाँ बटैली । औषधी खरिदके पाँच जनहनहे आर्थिक सहयोग, मानसिक समस्या रहल व्यक्तिहुकन राहात प्रदान, सेभ हाउसके लाग बजेट विनियोजन, परामर्शके कार्यक्रम संचालन ओ हिंसामे परल व्यक्तिहुकनहे सीपमूलक तालिम तथा आर्थिक सहयोग करल उप प्रमुख चौधरी बटैली ।

ओस्टेक करके कृष्णपुर नगरपालिकाके जनस्वास्थ्य निरिक्षक रतनसिंह विष्ट, पुनर्वास नगरपालिकाके रिता मल्ल ओ महाकाली प्रादेशिक अस्पताल ओसिएसीके नर्सिङ निरिक्षक सीता खडकाफे अपनेहुक्रे मनोसामाजिक समस्यामे परल व्यक्तिहुकनहे परामर्शसंगे औषधि उपचार सेवा डेटी रहल बटैले बटै ।

कोसिस नेपालके नवराज गौतम नेपालमे २५ प्रतिशतमे(बाँकी ३ पेजमे) मनोसामाजिक समस्या हुइल व्यक्ति रहल बटैलै । विश्व स्वास्थ्य संगठनके २०२१ के तथ्यांक अनुसार संसारमे ४ मनैन मन्से एक जनहनमे ओ नेपालमे ३ जनहन मन्से एक जनहनमे मनोसामाजिक समस्या रहल बटैलै । नेपालमे २० से ३० लाख मनै मनोसामाजिक समस्या भोग्टी रहल जनैलै । नेपाल प्रहरीके गैल बरसके तथ्याङक अनुसार ७ हजार १ सय ५६ जाने आत्महत्या करल उहाँ जनैलै ।

कार्यक्रममे सुदूरपश्चिम समाजके सचिव राज चौधरी यौनिक तथा लैङिक अल्पसंख्यक समुदाय विभेदके कारण मानसिक समस्या भोगे पर्ना बाध्य हुइल बटैली । उ समुदाय काम कैना बेला दुव्र्यवहार, यौन दुव्र्यवहार, लालछना भोगे पर्ना समस्या आइल बटैली । मानसिक समस्यामे परल दिदीबाबुनके लाग सेभहाउस रहल मने पुरुषके सेभहाउसके व्यवस्था नइरहल उहाँ बटैली ।

कोसिस नेपाल सुदूरपश्चिम प्रदेशके मनोसामाजिक विमर्शकर्ता पशुपति खाती मनोसामाजिक समस्यामे परल महिलाहुक्रे रोकेफे अपन पीडा पोखल मने यी समस्यामे परल पुरुषभर अपन पीडा पोखे नइपाइल बटैली ।