विपद व्यवस्थापन तालिम सुरु

पहुरा समाचारदाता
हसुलिया, ३ जेठ । कैलालीके कैलारी गाउँपालिकामे विफेक रोजसे दुई दिने विपद व्यवस्थापन तालिम सुरु हुइल बा ।
गाउँपालिका अध्यक्ष राजमझ चौधरीके अध्यक्षतामे उदघाटन हुइल तालिममे उहाँ कैलारीमे टमान मेरिक जोखिम रहल बटैलै । उहाँ कहलै, मोहना, घुरहा ओ कटैनी लडिया तटिया क्षेत्रमे बाढ डुबान, कटानके समस्या बा, भारतके सीमासे जोरल कारण बन्य जन्तुके पीडित ओ आगलागीके उच्च जोखिमफे रहल बटैलै ।

विपद व्यवस्थापन तालिमसे विपद जोखिम न्यूनिकरण करे सेक्ना बटैलै । तालिम उदघाटन कार्यक्रममे गाउँपालिका उपाध्यक्ष भगवतीकुमारी चौधरी, प्रमुख प्रशासकीय अधिकृत लक्ष्मी दत्त भट्ट, वडा नम्बर ३ के वडा अध्यक्ष सन्तराम चौधरी, गाउँपालिका प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम लगायतके पहुनाके सहभागिता रहे ।

नेपाल रेडक्रस सोसाइटी कैलालीके आयोजना तथा कैलारी गाउँपालिकाके समन्वयमे कैलारी ओ भजनीके बाढ प्रभावित क्षेत्रके सहभागितामे तालिम हुइटी रहल बा । तालिम उदघाटन कार्यक्रमके संचालन कैलारी गाउँपालिका सामाजिक विकास शाखा प्रमुख यगम कलेल ओ स्वागत रेडक्रस सोसाइटीके विनायक पनेरु करल रहिट ।

