नवजीवनके अध्यक्षमे बम विजयी
नवनिर्वाचित नयाँ कार्यसमितिहे पदास्थापन
पहुरा समाचारदाता
धनगढी, १ चैत । कैलालीके धनगढीस्थित नवजीवन सहकारी संस्थाके २८ औं साधारणसभासे अध्यक्षमे देवबहादुर बम विजयी हुइल बटैं ।
अध्यक्षके औरे उम्मेदवार रतनबहादुर कठायतहे पराजित कैके बम विजयी हुइल हुइट् । नवजीवन सहकारी संस्थामे २९ हजार ५ सय ७७ शेयर सदस्य रहलमे गिरल १७ हजार ८० मतमध्ये बम ८ हजार ३९१ मत पैलैं । प्रतिद्वन्द्वी कठायत ७ हजार ८३ मत पैलैं ।
ओस्टेक, उपाध्यक्षमे चेतराज ओझा निर्वाचित हुइल बटैं । सदस्यमे ईन्दिरा जैशी, उत्तम जोशी, गोपालराज पाठक, केशवराज मिश्र, महेशराज बिष्ट, घनबहादुर शाह विजयी हुइल बटैं । ओस्टेक, उपेन्द्र बिष्ट, शिवकुमार जोशी, गणेश बम, जयराज जोशी, विश्वनाथ ओझा फेन सदस्यमे विजयी हुइल बटैं । ओस्टेक, लेखा सुपरिवेक्षण समितिके संयोजकमे चेतराज जोशी, सदस्यमे गणेशप्रसाद उपाध्याय ओ लक्ष्मीराज पन्त निर्वाचित हुइल बटैं । नवनिर्वाचित लौवा कार्यसमितिहुकनहे मंगरके रोज एक कार्यक्रमके विच पदास्थापन तथा गोपनियताके सपथ ग्रहण करागिल बा ।
पदास्थापन तथा गोपनियताके सपथ ग्रहण कार्यक्रमके वडका पहुना सुदूरपश्चिम प्रदेश आर्थिक मामिला मन्त्री तारा लामा तमाङ सस्था स्थापित हुसेकल कहटी आब शेयर सदस्यहुकन स्थापित कैना आग्रह करल रहिट । नवजीवन सहकारी प्रदेशके गौरव रहल ओरसे आब शेयर सदस्यहे नयाँ जीवन डेनाफे उहाँ आग्रह करलै ।
कार्यक्रममे संस्थाके पहिल शेयर सदस्य तथा पूर्व माननीय महेश्वर पाठक, सल्लाहकार संयोजक करुणाकर पाण्डे, निवर्तमान अध्यक्ष चक्र बहादुर सिंह, निर्वाचन संयोजक डा. लोकबहादुर विष्ट, पत्रकार महासंघ कैलालीके अध्यक्ष हिमालय जोशी लगायत शुभकामना तथा बधाई डेहल रहिट ।
नवनिर्वाचित अध्यक्ष देवबहादुर वम सक्कुहुनके सहयोग सुझावके साथ आघे बह्रना प्रतिवद्धता जनैलै । २०५० सालमे स्थापना हुइल नवजीवन सहकारीमे अब्बे २९ हजार ५ सय शेयर रहल बटै ।
कार्यक्रममे आघेक कार्यसमितिके अध्यक्षलगायत सल्लाहकार ओ पदाधिकारीहुकनहे सम्मान तथा मायाके चिनो प्रदान कैगिल रहे । ओहेबीच जिफन्टके अध्यक्षसमेत रहल बमहे जिफन्टसे फेन ओहे कार्यक्रममे उहाँहे सम्मान करगिल रहे ।