धनगढीमे गायत्री महायज्ञ हुइना

पहुरा समाचारदाता
धनगढी,४ कुवाँर । कैलालीके धनगढी उपमहानगरपलिका वडा नम्बर ७ पटेलामे गायत्री महायज्ञ २०७९ हुइना बा ।

धनगढीमे मंगरके ऋषिकेश पीठ धर्म संरक्षण सम्वद्र्वन समिति बेलीसे पत्रकार सम्मेलनके आयोजना करटी यिहे कुवाँर १० गते से १८ गतेसम गायत्री महायज्ञ आयोजना कैना जानकारी डेहल हो । महायज्ञके स्वामी इतुस्वारान्द नेपालमे पहिल चो गायत्रीे महायज्ञ हुई लागल बटैलै । अभिनसम हिन्दुस्थानमेफे अटरा भारी महायज्ञ नइहुइल दावी समेत करलै । १०८ हवन कुन्डमे १०८ हवन कर्ताहुक्रे ९ दिनसम गायत्री मन्त्रमे हवन कैना उहाँ बटैलै । एक सय १५ जाने ब्राहमण पण्डिहुक्रे यी यज्ञहे सहजीकरण कैना उहाँक कहाई बा । आत्मा कल्याण ओ समाजके कल्याण होए कना उद्देश्यसे यज्ञ करे लागल उहाँ बटैलै । यज्ञसे समाजहे सु–संगठित ओ व्यक्तिहे समुन्नत बनैनामे मद्दत कैना उहाँ बटैलै ।

महायज्ञ आयोजक समितिके अध्यक्ष पुष्करनाथ ओझा ऋषिकेश पीठधर्म संरक्षण सम्वद्र्वनत समितिहे डेहल जमिनमे महायज्ञ करे लागल बटैलै । गैल वर्ष महायज्ञ कैना कहलेसेफे कोरोनाके कारणसे यी वर्ष महायज्ञ करे लागल उहाँ बटैलै । महायज्ञमे डेढ करोड जटरा लागत लग्ना अनुमान करल उहाँ बटैलै ।

धनगढीसे महायज्ञ स्थलसम सार्वजनिक बस सञ्चालनके लाग बस व्यवसायीसंग समन्वय कैना तयारी करल उहाँ बटैलै । महायज्ञ हुइना स्थानहे धार्मिक स्थलके रुपमे विकास करेक लाग संस्था बनाके सरकारसे भूमि प्राप्त करल उहाँ बटैलै । मास्टर प्लान बनाके ओम्ने गौशाला, गुरुकुल, धर्मशाला, अनाथालय, मठ–मन्दिरलगायतके संरचना बन्ना उहाँ बटैलै ।
यज्ञके लाग आवश्यक तयारी अन्तिम चरणमे रहल उहाँ बटैलै । श्री श्री १००८ महामण्डलेश्वर स्वामी राहु श्रृरानंदगिरीके उपस्थितिमे महायज्ञ हुइना बा ।