‘सजन मोर’ के १३ मिलियन ढेर भ्युज
पहुरा समाचारदाता
धनगढी, २२ अगहन । थारु म्युजिक भिडियो ‘सजन मोर’ के १३ मिलियन ढेर भ्युज पैले ा । उ अवसरमे ‘सजन मोर’ टीम मंगरके कैलालीके सुख्खडमे सफलता उत्सव मनैले बा ।
दर्शक तथा स्रोताहुक्रनके साथ सहयोगसे म्युजिक भिडियोहे सफलता मिलल् गीतके गायक एके चौधरी बटैलै ।
उहाँ कहलै,–‘सक्कु कलाकारहुक्रनके मेहनत, दर्शक तथा स्रोताके साथ, सहयोगसे हम्रहीनहे सफलता मिलले बा । कला, साहित्यके माध्यमसे हमार भाषा, कला सँस्कृति ओ पहिचान संरक्षण, सम्बर्द्धन कैना इ सफलतासे थप उर्जा थपल बा ।’
रामकुमार चौधरीके शब्द, संगीत रहल गीतमे गायक एके चौधरी ओ गायिका अन्नु चौधरीके स्वर रहल बा । म्युजिक भिडियोमे नरेश चौधरी ओ मधु चौधरीके अभिनय रहल बा । सुरजदेव कुसम्याके निर्देशन रहल म्युजिक भिडियोके अफिसियल युट्यूव मल्टीफ्रेम स्टुडियो युट्युव च्यानल रहल बा ।
कार्यक्रममे फिल्म निर्देशक राजकुमार श्रेष्ठ, राष्ट्रिय थारु कलाकार मञ्चके उपाध्यक्ष समु चौधरी, हमार म्युजिक बगियाके अध्यक्ष बीर चौधरी, सुपक थारु सलिमाके कोषाध्यक्ष गोबिन्द मुखिया, घोडाघोडी तथा संस्कृति संरक्षण समाजके अध्यक्ष चन्द्र चौधरी लगायत रहल रहिट ।
ओस्टके कार्यक्रममे जिल्ला तथा जिल्ला बाहरके थारु कलाकार, नृत्य निर्देशक, क्यामेरा पर्सन, कलाप्रेमी, बुद्धिजीवी, समाजसेवीहुक्रनके सहभागीता रहल रहे । कार्यक्रमके सञ्चालन कलाकार अन्जान चौधरी करल रहिट ।
